رووداو دیجیتاڵ
میدیای فەرمیی ئێران رایگەیاند، لە دوو شەوی رابردوودا 19 کەشتیی سەرپێچیکار لە تەنگەی هورمز لەلایەن هێزە چەکدارەکانی ئێرانەوە کراونەتە ئامانج.
ئەمڕۆ یەکشەممە، 27 ئەیلوولی 2026، ئاژانسی هەواڵی (فارس نیوز)ی نزیک لە سوپای پاسداران لە راپۆرتێکدا بە پشتبەستن بە چەند سەرچاوەیەکی ئاگاداری سەربازییەوە رایگەیاند، هێزە چەکدارەکانی ئێران لە ماوەی دوو شەوی رابردوودا رووبەڕووی ئەو کەشتییانە بوونەتەوە کە بە نیازبوون لە رێڕۆوە نایاسایییەکانەوە لە تەنگەی هورمز تێپەڕن.
بەپێی راپۆرتی ئاژانسەکە، "شەوی رابردوو 7 کەشتی و شەوی پێشتریش 12 کەشتیی سەرپێچیکار لەلایەن هێزە سەربازییەکانی ئێرانەوە کراونەتە ئامانج."
لە راپۆرتەکەدا ئاماژە بەوە کراوە، کە "ئەو کەشتییانە گوێیان بە هۆشدارییەکانی ئێران نەداوە و رێوشوێنە تایبەتەکانی ئێرانیان سەبارەت بە تەنگەی هورمز پێشێل کردووە، بۆیە هێرشیان کراوەتە سەر."
ئەم پێشهاتە لە کاتێکدایە، کە دۆناڵد ترەمپ، سەرۆکی ئەمریکا چەندین جار دووپاتی کردووەتەوە کە تەنگەی هورمز بە تەواوەتی لە کۆنتڕۆڵی ئەمریکادایە.
بەرپرسانی ئێران پێشتر جەختیان لەوە کردبووەوە، ئەو کەشتییانەی کە بەبێ مۆڵەتی ئێران لە رێڕۆیە دیاریکراوەکان تێپەڕن، لەگەڵ پەرچەکرداری هێزە چەکدارەکانیان رووبەڕوو دەبنەوە.
لە سەرەتای هەڵگیرسانی جەنگەوە، ئێران تەنگەی هورمزی داخستووە، لە بەرامبەریشدا ئەمریکا گەمارۆی دەریایی پێچەوانەی خستووەتە سەر بەندەرەکانی ئێران.
پێش دەستپێکردنی جەنگەکە و راگرتنی جموجووڵی کەشتییەکان، ئەو تەنگەیە ریڕۆیەکی زۆر گرنگ بوو بۆ بازرگانیی نەوت و گاز و نزیکەی 20٪ی وزەی جیهان بەو تەنگەیەدا تێدەپەری.
