.jpg&w=3840&q=75)
رووداو دیجیتاڵ
رۆژی دووشەممە، سوپای ئوردن رایگەیاند، وەک تۆڵەسەندنەوەیەک بۆ هێرشەکەی هەفتەی رابردووی سەر کەنیسەیەک، چەند پێگەیەکی "گرووپە تیرۆریستییەکان"ـی لەنێو خاکی سووریا بۆردوومان کردووە. لە بەرامبەردا سووریا دەڵێت، ئوردن بۆ هێرشە ئاسمانییەکانی، هیچ هاوئاهەنگییەکی لەگەڵ دیمەشق نەکردووە و بەهۆیەوە 5 کەسی سڤیل کوژراون.
ئاژانسی هەواڵی فەرمیی سووریا (سانا) لە زاری بەرپرسێکی تەندروستیی پارێزگای دەرعا لە باشووری ئەو وڵاتە بڵاویکردەوە، بەهۆی بۆردوومانەکانی ئوردنەوە بۆ سەر چەند ناوچەیەکی پارێزگاکە، پێنج کەسی سڤیل کوژراون کە ژن و منداڵیان تێدایە. بەڵام سوپای ئوردن دەڵێت، فڕۆکە جەنگییەکانیان چەندین مۆڵگەی تیرۆریستانیان وێران کردووە و ژمارەیەکی زۆر لە ئەندامانی ئەو گرووپانەیان کوشتووە و بریندار کردووە کە پەیوەندییان بە هێرشبەرەکانی کەرەکەوە هەبووە.
وردەکاریی هێرشەکەی سەر کەنیسەکەی کەرەک
ئەم پێشهاتانە پەیوەستن بە رووداوەکەی رۆژی هەینیی رابردوو، کە تێیدا چەند چەکدارێک لە کاتی پرسەیەکدا، هێرشیان کردە سەر کەنیسەی مار جۆرجیسی یۆنانیی ئۆرسۆدۆکس لە گوندی حەموود لە پارێزگای کەرەک لە باشووری ئوردن و 9 کەسیان کوشت.
لیوا عەبدوڵڵا مەعایتە، بەڕێوەبەری ئاسایشی گشتیی ئوردن، رۆژی دووشەممە ناوی هەر سێ تۆمەتبارە دەستگیرکراوەکەی ئاشکرا کرد کە بریتین لە: هەزاع زێدان محەممەد، مەشعەل زێدان محەممەد و ئەحمەد سامی حوسێن. دوو لە تۆمەتبارەکان بران و ئەوەی دیکەشیان خزمیانە. ئەوان لە ماڵێکی چۆڵکراودا گەمارۆ دران و تەقەیان لە هێزە ئەمنییەکان کرد، بەڵام دواتر بە برینداری دەستگیر کران و دەستیش بەسەر بڕێکی زۆر لە چەک و تەقەمەنیدا گیرا.
هەڵوێستی فەرمی و رێوڕەسمی بەخاکسپاردنی قوربانییان
مازن فەڕایا، وەزیری ناوخۆی ئوردن رایگەیاند، هێرشبەرەکان سەرجەمیان ئوردنین و هیچ بەڵگەیەک نییە لەسەر هەبوونی پەیوەندیی دەرەکی. محەممەد مۆمەنی، وەزیری پەیوەندییەکانی حکومەتیش جەختی لەوە کردەوە کە بە "مستێکی ئاسنین و بێبەزەییانە" لێیان دەدەن.
لە دوای هێرشەکەوە، جەعفەر حەسەن، سەرۆکوەزیرانی ئوردن سێ رۆژ ماتەمینیی نیشتمانیی راگەیاند. رۆژی یەکشەممە 8 لە قوربانییەکان لە تەنیشت کەنیسەکە بەخاکسپێردران و کوژراوی نۆیەمیش رۆژی دووشەممە بەخاکسپێردرا. کرستیانەکان لە ئوردن نزیکەی 2% بۆ 3%ی دانیشتووانی وڵاتەکە پێکدەهێنن.
