رووداو دیجیتاڵ
سوپای پاسدارانی ئێران دەڵێت، لە هێرشێکی مووشەکیدا لەنزیک ئێران، کەشتیی پشتیوانی و فڕۆکەهەڵگری MSTی سوپای ئەمریکایان کردووەتە ئامانج.
ئێوارەی ئەمڕۆ شەممە 28-02-2026، پەیوەندییە گشتییەکانی سوپای پاسداران راگەیێندراوێکی بڵاوکردەوە و تێیدا هاتووە، هێزەکانی دەریایی سوپاکە، بە هێرشێکی مووشەکی، کەشتیی پشتیوانی و فڕۆکەهەڵگری MSTی ئەمریکایان لە کەنداو کردووەتە ئامانج.
سوپای پاسداران راشیگەیاندووە، لە ئەنجامی هێرشەکەدا زیانێکی زۆر بەر کەشتییەکە کەوتووە و ''لە داهاتووشدا کەشتییەکانی دیکەی ئەمریکا دەکرێنە ئامانجی هێرشە درۆنی و مووشەکییەکانی سوپا و بەردەوام دەبین لە پێکانیان.''
هێرشەکەی هێزی دەریایی سوپای پاسداران لە کەنداو لەدوای ئەوە دێت کە بەیانیی ئەمڕۆ ئەمریکا و ئیسرائیل بە هاوبەشی هێرشێکی بەرفراوانیان بۆسەر ئێران دەستپێکرد و کەمێک دواتریش سوپای پاسداران دەستی بە هێرشکردنە سەر پێگەکانی ئەمریکا لە ناوچەکە و ئیسرائیل کرد.
