رووداو دیجیتاڵ
نامۆ فازیڵ، شەڕکەر و پاڵەوانی کورد دوای ئەوەی لە دوایین یارییدا بە شەڕکەرێکی بەرازیلی دۆڕا، لە گرتەیەکی ڤیدیۆییدا رایگەیاند کە بەر لە یارییەکە 15 کەسی چیچانی چوونەتە سەری و لێیانداوە بۆ ئەوەی لە یارییەکە بکشێتەوە و هەر ئەو دۆخە دەروونییەش هۆکارێک بوو بۆ دۆڕاندنی.
ئەو پەیامەی نامۆ فازیڵ تووڕەبوونێکی لای چیچانییەکان دروست کرد، کە کۆمەڵێک لە باشترین شەڕکەرانی جیهانیان هەیە و کار گەیشتە ئەوەی حەمزە چێمایێڤی شەڕکەی چیچانی پەیامێک بڵاوبکاتەوە، کە تێیدا رایگەیاند "رێزم بۆ کوردە بەهێزەکان هەیە و سەڵاحەدینی ئەیوبی یەکێکە لە گەورەترین جەنگاوەران".
جارێکی دیکە نامۆ فازیڵ پەیامێکی بڵاوکردەوە و رایگەیاند کە کێشەی لەگەڵ چیچان و چیچانییەکان نییە و کێشەی ئەو تەنیا لەگەڵ یەک کەسە، کە ئەمە دەقی پەیامەکەیەتی:
دەمەوێت دۆخەکە روون بکەمەوە، چونکە وا دەردەکەوێت لێکتێنەگەیشتنێکی زۆر لە دەوری ئەم بابەتە هەبێت.
من هیچ کێشەیەکم لەگەڵ چیچانییەکان یان گەلی چیچان نییە. من زۆر هاوڕێی چیچانیم هەیە کە وەک برا دەیانبینم، و جگە لە رێز هیچم بۆ ئەو نەتەوەیە بەگشتی نییە. من و ئیسلام دۆلاتۆڤ بەتایبەتی قسەمان کرد، وەک پیاو کێشەکانمان چارەسەر کرد، و لەڕێگەی ئەو گفتوگۆیەوە بەڕاستی برایەکم تێدا دۆزییەوە.
کێشەی من لەگەڵ تەنیا یەک کەسە. ئەمە بابەتێکی کەسییە لە نێوان من و ئەو، و بەهیچ شێوەیەک پەیوەندی بە نەتەوەکەی یان ئەوەی خەڵکی کوێیە نییە.
لە شەوی کێش دابەزاندنمدا (weight cut)، لە کاتێکدا لەڕووی جەستەییەوە زۆر هیلاک بووم و لەناو sauna blanket بووم و دەستەکانم لەناو بوون، نزیکەی 15 پیاو هاتنە ژووری ئوتێلەکەم و لەبەردەم هاوژینەکەم و راهێنەرەکانمدا دووجار لێم درا.
خۆتان بخەنە ئەو شوێنە بۆ ساتێک. وێنای ئەوە بکەن 15 پیاو بێنە ناو ژووری ئوتێلەکەت لەکاتێکدا لە لاوازترین باری جەستەییدایت، ناتوانیت بەباشی بەرگری لە خۆت بکەیت، و لەبەردەم هاوژین و تیمەکەتدا دەستت لێ بدەن. هەر کەسێک لەگەڵ خۆیدا راستگۆ بێت
تێدەگات کە رووداوێکی لەو شێوەیە دەتوانێت کاریگەری لەسەر ئامادەکاری دەروونی، سەرنج، و باری هزریت هەبێت پێش گەورەترین شەڕی ژیانت.
لەگەڵ ئەوەشدا، من هەرگیز ئەوەی روویدا وەک بیانوویەک بۆ دۆڕانەکەم بەکارناهێنم. من شەڕەکەم دۆڕاند، و بەسەربەرزییەوە بەرپرسیارێتی دۆڕانەکەم هەڵدەگرم، وەک هەر پیاوێکی راستەقینە. رکابەرەکەم ئامادە بوو، کارەکەی خۆی کرد، و منیش ئەنجامەکە قبوڵ دەکەم. بێ بیانوو. لێیەوە فێر دەبم و بە بەهێزییەوە دەگەڕێمەوە.
بەڵام هەڵگرتنی بەرپرسیارێتی لە ئەدای کارکردنم بەو مانایە نییە کە درۆ بکەم و وا نیشان بدەم کە ئەوەی پێشوەختە روویدا هیچ کاریگەرییەکی لەسەرم نەبووە. هەردوو شتەکە دەکرێت راست بن.
و دەمەوێت بۆ دواجار ئەمە بە تەواوی روون بکەمەوە: من هیچ کێشەیەکم لەگەڵ چیچان، چیچانییەکان، یان کۆمەڵگەی چیچانی نییە. من کێشەم لەگەڵ تەنیا یەک کەس هەیە بەهۆی ئەوەی لە نێوان من و ئەو روویدا. هیچی تر، نە کەمتر و نە زیاتر.
بەڕێزەوە، نامۆ فازیڵ
