رووداو دیجیتاڵ
هاووڵاتییەک لە پارێزگای ئیزمیری تورکیا شەڕ دەکات و گاز لە گوێی کەسی بەرامبەر دەگرێ و بەشێکی لێ دەکاتەوە.
رووداوەکە کاژێر 10:00ی شەوی رابردوو 20-10-2026 لە ناوچەی کۆناکی سەر بە پارێزگای ئیزمیری تورکیا روویدا.
پیاوێکی تەمەن 44 ساڵ بە ناوی (گیونەی) لەگەڵ خێزانەکەی لە کەنار دەریا دانیشتبوو و لەگەڵ کەسێکی نەناسراو لێیان دەبێتە شەڕە قسە.
لە ئەنجامدا گیونەی هێرشی کرایەسەر و گاز لە گوێی گیرا. بە گوتەی شایەتحاڵان، دەمەقاڵێکە دوای ئەوە دروستبووە کە گازگرەکە بە قسەی نەشیاو گیونەی و خێزانەکەی بێزارکردووە.
گیونەی پارچەیەک لە گوێی چەپی لێکرایەوە و بۆ نەخۆشخانە گوێزرایەوە. سەرەڕای گەڕانی زۆر، پارچە گوێیەکە نەدۆزرایەوە.
تیمەکانی پۆلیس و فریاکەوتن چوونە شوێنی رووداوەکە. کارمەندانی تەندروستی لە شوێنی رووداوەکە فریاگوزاریی سەرەتاییان پێشکێشی گیونەی کرد کە خوێن لە گوێی دەچۆڕا.
هاوکات پۆلیسیش بە لایتی دەست بە شوێن پارچە گوێیەکەدا دەگەڕان، بەڵام نەیانتوانی بیدۆزنەوە.
دواتر گیونەی بە ئەمبوڵانس بۆ نەخۆشخانەی تەپەجیک لە ئیزمیر گوێزرایەوە و خرایە ژێر چارەسەرەوە.
پزیشکەکان گوتیان، مەترسی لەسەر ژیانی گیونەی نییە، بەڵام زیان بە بەشێک لە شانەکانی گوێی گەیشتووە.
تیمەکانی پۆلیس بۆ دەستنیشانکردنی ناسنامەی هاووڵاتییەکە و دەستگیرکردنی، کامێراکانی چاودێریی ناوچەکەیان خستووەتە ژێر پشکنین و بەدواداچوونێکی بەرفراوانیان دەستپێکردووە. هاوکات لێکۆڵینەوە لە رووداوەکە بەردەوامە.
