رووداو دیجیتاڵ
نێچیرڤان بارزانی، سەرۆکی هەرێمی کوردستان لە شاری ئەنتالیای تورکیا لەگەڵ یاشار گولەر، وەزیری بەرگریی ئەو وڵاتە کۆبووەوە و دۆخی ئەمنی و هەماهەنگیی سەربازیی نێوانیان تاوتوێ کرد.
سەرۆکایەتیی هەرێمی کوردستان لە راگەیێندراوێکدا بڵاویکردەوە، ئەمڕۆ چوارشەممە، 11ـی تشرینی دووەمی 2026، "لە پەراوێزی کارەکانی لووتکەی ئاووهەوا لە ئەنتالیا، نێچیرڤان بارزانی، سەرۆکی هەرێمی کوردستان لەگەڵ یاشار گولەر، وەزیری بەرگریی تورکیا کۆبووەوە."
لەبارەی ناوەڕۆکی گفتوگۆکانی نێوانیان، لە راگەیێندراوەکەی سەرۆکایەتیی هەرێمی کوردستاندا هاتووە: "لە کۆبوونەوەکەدا، بارودۆخی ئەمنی و سەربازیی ناوچەکە، هاریکاریی هاوبەشی نێوان تورکیا و عێراق و هەرێمی کوردستان بۆ پاراستنی ئاسایش و سەقامگیری، تاوتوێ کران."
هەر بەگوێرەی راگەیێندراوەکە، پرسی پەیوەندییە ئەمنییەکان تەوەرێکی سەرەکیی دیدارەکە بووە و ئاماژە بەوە کراوە: "هەردوولا جەختیان لە گرنگیی بەردەوامیی هەماهەنگیی ئەمنی و پاراستنی ئارامی کردەوە بە شێوەیەک کە لە خزمەت سەقامگیریی هەردوولادا بێت."
