رووداو دیجیتاڵ
سەرەڕای کشانەوەی هێزەکانی هاوپەیمانان لە عێراق و هەرێمی کوردستان، بەرپرسانی ئەمریکا و شارەزایان جەخت لەوە دەکەنەوە کە پەیوەندییە سەربازی و ستراتیژییەکانی نێوان واشنتن و هەولێر "بە بەهێزی دەمێننەوە"، بەڵام رووبەڕووی ئاڵنگاریی نوێ دەبنەوە، بەتایبەتی لەڕووی بەرگریی ئاسمانییەوە.
جۆی هوود، یاریدەدەری پێشووی وەزیری دەرەوەی ئەمریکا بۆ کاروباری رۆژهەڵاتی نێوەڕاست، پێی وایە کشانەوەکە کاریگەریی لەسەر تۆکمەیی پەیوەندییەکانیان نابێت و هێزی پێشمەرگە بە "هاوبەشێکی گرنگی سوپای ئەمریکا" دەمێنێتەوە.
جۆی هوود، بە رووداوی راگەیاند: "پەیوەندییەکان بە بەهێزی و تۆکمەیی دەمێننەوە، چونکە پێشمەرگە لەمێژە هاوبەشێکی سوپای ئەمریکایە و پێکەوە داعشمان تێکشکاند. بەڵام ئێستا قۆناخەکە پێویستی بە رۆڵێکی بەهێزی بەغداش هەیە بۆ ئەوەی ئەو داواکارییانە پەسند بکات کە پەیوەستن بە سیستمی بەرگریی ئاسمانی بۆ هەرێمی کوردستان، چونکە ئەوە توانایەکە ئێستا پێشمەرگە نییەتی و پێشتر لەلایەن هاوپەیمانانەوە دابین دەکرا."
گوتەبێژێکی وەزارەتی دەرەوەی ئەمریکا بە رووداوی راگەیاند: واشنتن پشتیوانی لە "کوردستانێکی بەهێز و خۆڕاگر" دەکات، وەک بەشێک لە کۆڵەگەی سەرەکیی پەیوەندییەکانی لەگەڵ عێراق.
پرسیاری سەرەکی ئەوەیە، ئایا دوای کشانەوەی هێزەکانی ئەمریکا، گرووپە چەکدارەکان لە هێرشکردنە سەر هەرێمی کوردستان بەردەوام دەبن؟
د. یەریڤان سەعید، پڕۆفیسۆر لە زانکۆی ئەمریکی لە واشنتن، پێی وایە بوونی هێزەکانی ئەمریکا تەنیا "بیانوو" بووە و هێرشەکان بەردەوام دەبن. ئەو دەڵێت، "ئەو گرووپانە بەردەوام دەبن لە هێرشکردنە سەر هەرێمی کوردستان و زیانگەیاندن بە کەرتی ئابووری، بەتایبەتی کەرتی وزە. بۆیە چارەسەری راستەقینەی ئەو قەیرانە، دۆزینەوەی چارەسەرێکی سیاسییە."
بەپێی تێڕوانینی ئیدارەی پێشووی ئەمریکا، گرنگیی پەیوەندییەکان زیاتر لە بواری ئابووریدایە نەک سەربازی. بۆیە ئەمریکا ئامادەیە چەک و سیستمی بەرگری بە حکومەتی عێراق بفرۆشێت و لەسەر حکومەتی عێراقیش پێویستە بەشێک لەو چەکانە بۆ پاراستنی ئاسایشی هەرێمی کوردستان دابین بکات.
