رووداو دیجیتاڵ
لە چەند رۆژی رابردوودا، بارانێکی بەخوڕ و لافاو ناوچەکانی رۆژهەڵاتی ئیسپانیای گرتەوە و بەهۆیەوە چوار کەس گیانیان لەدەستدا.
لە هەندێک ناوچەی هەرێمی ڤالێنسیا، تەنیا لە ماوەی 24 کاژێردا بڕێکی یەکجار زۆر باران باریوە کە بووەتە هۆی نقومبوونی چەند گەڕەکێک. لافاوەکە ئۆتۆمبێلەکانی بردووە، رێگەکانی داخستووە و خەڵکێکی زۆری لە نێو ماڵەکانیاندا گیرکردووە. تیمەکانی فریاگوزاری ناچار بوون بە هێلیکۆپتەر خەڵک لە نێو ئاوەکە دەربهێنن و زیاتر لە 400 کەسیان رزگار کردووە.
قوربانییەکان کێن؟
- ژنێکی تەمەن 79 ساڵ لە نێو ماڵەکەی خۆیدا گیانی لەدەستداوە.
- پیاوێک لە کەمپێکی گەشتیاریدا بەهۆی جەڵتەی دڵەوە گیانی لەدەستداوە.
- پیاوێکی دیکە لە کاتی مەلەکردندا لە دەریادا خنکاوە.
- ژنێکیش لە هەرێمی کەتەلۆنیا کەوتووەتە نێو چەمێکەوە و لافاو بردوویەتی.
حکومەت چی کردووە؟
حکومەت بۆ پاراستنی گیانی هاووڵاتییان، داوای لە خەڵکی نزیکەی 100 شارۆچکە کرد کە بۆ چەند کاژێرێک لە ماڵەکانیان نەچنە دەرەوە. پێدرۆ سانچێز، سەرۆکوەزیرانی ئیسپانیا بەڵێنی داوە کە حکومەت و سوپا هەموو هاوکارییەک دەکەن بۆ یارمەتیدانی لێقەوماوان.
بۆچی ئەم لافاوانە روودەدەن؟
زانایان دەڵێن هۆکاری سەرەکیی ئەم زریان و لافاوە گەورانە، گۆڕانی کەشوهەوایە. چونکە هاوینی ئەمساڵ زۆر گەرم بووە و ئاوی دەریای نێوەڕاست گەرم داهاتووە، ئەمەش وایکردووە ئاوێکی زۆر ببێتە هەڵم و پاشان لە وەرزی پاییزدا بە شێوەی بارانێکی زۆر قورس ببارێتەوە. مانگی رابردووش گەرمترین مانگی ئەیلوول بووە لە تەواوی مێژووی ئیسپانیادا.
