گووگڵ بەکارهێنانی Gemini 4 Argon سنووردار دەکات

کۆرای کاڤوکچوئۆغڵو، سەرۆکی ئەندازیارانی ژیریی دەستکرد لە کۆمپانیای گووگڵ لە گوتارێکدا لەبارەی ناساندنی ئەم مۆدێلە نوێیە نووسیویەتی: "بۆ ئەوەی ئەم توانستە پێشەنگانە بە شێوەیەکی بێزیان و سەلامەت بەردەست بکرێن، پێویستە قۆناخ بە قۆناخ بخرێنە روو."

گووگڵ باسی لەوە کردووە کە بە شێوەیەکی ئارەزوومەندانە رێگە دەدات حکومەتی ئەمریکا بتوانێت ئەم مۆدێلە بەکاربێنێت و بەر لەوەی بە شێوەیەکی بەرفراوان بیخاتە بەردەست، سەرنج و تێبینییەکانی ئەو لایەن و پسپۆڕانە کۆدەکاتەوە کە وەک تاقیکردنەوە بەکاریدێنن.

رێکاری وریایانە لە کێبڕکێی زەبەلاحەکاندا

ئەم هەنگاوە وریایانەی گووگڵ هاوشێوەی رێکاری کۆمپانیای رکابەریەتی کە ئەنترۆپیکە (Anthropic)، کە بەهێزترین مۆدێلی خۆی بە ناوی "کلۆد میسۆس پریڤیو" تەنیا بۆ ژمارەیەکی کەم لە رێکخراوەکان بەردەست کردووە. واشنتن لە مانگی حوزەیراندا بۆ ماوەیەکی کاتی کۆمپانیای ئەنترۆپیکی ناچار کرد دەستگەیشتن بە مۆدێلەکانی رابگرێت و لەو کاتەوە پرۆسەیەکی ئارەزوومەندانەی بۆ پشکنینی بەهێزترین مۆدێلەکانی ژیریی دەستکرد پێش بڵاوکردنەوەیان داناوە.

ئەم بڕیارەی گووگڵ رۆژێک دوای ئەوە هات کە دۆناڵد ترەمپ، سەرۆکی ئەمریکا لە کۆشکی سپی پێشوازی لە سەرکردە باڵاکانی بواری تەکنەلۆجیا کرد، لەوانەش سوندار پیچای، بەڕێوەبەری گووگڵ و داریۆ ئامۆدێی، بەڕێوەبەری ئەنترۆپیک، کە تێیدا بەڵێننامەیەکی ئارەزوومەندانەیان واژۆ کرد بۆ کۆنترۆڵکردنی مەترسییەکانی سیستمەکانی ژیریی دەستکردی خۆیان.

توانستی بێوێنە و مەترسییەکانی هاککردن

شارەزایانی ئاسایشی سایبەری نیگەرانن لەوەی کە ئەم تەکنەلۆجیا پێشکەوتووە بۆ هاککردنی بانکەکان، نەخۆشخانەکان و سیستمەکانی حکومەت بەکاربهێنرێت. گووگڵ دەڵێت مۆدێلی ئارگۆن لە جێبەجێکردنی ئەرکە ئاڵۆزەکانی ئەندازیاریی پرۆگرامسازی، کاروباری یاسایی، دارایی و بەرگریی سایبەریدا زۆر باڵایە و توانایەکی بێوێنەی لە دۆزینەوە و چاککردنی کەلێنە مەترسیدارەکانی پرۆگرامسازیدا هەیە.

گووگڵ دەشڵێت تاقیکەرەوە سەرەتاییەکان توانیویانە لە رێگەی ئارگۆنەوە کەلێنێکی ئەمنی لەو نەرمەکاڵایەدا بدۆزنەوە کە لە نەخۆشخانەکانی سەرتاسەری جیهاندا بەکاردێت کە زانیارییە کەسییە هەستیارەکانی ئاشکرا دەکرد؛ کەلێنێک کە مۆدێلە پێشکەوتووەکانی دیکە نەیانتوانیبوو دەستنیشانی بکەن.

رێگری لە بەکارهێنانی سەربازی و لادانی مۆدێلەکان

هەروەها گووگڵ باسی لەوە کردووە کە ئارگۆن بە جۆرێک داڕێژراوە، ئەو داواکارییانە بە تەواوی رەتبکاتەوە کە دەکرێت یارمەتیدەر بن لە ئەنجامدانی هێرشی سایبەری یان پەرەپێدانی چەکی کیمیایی، بایۆلۆجی یان ئەتۆمی. کۆمپانیاکانی ئەنترۆپیک و ئۆپن ئەی ئای (OpenAI) هەمان رێکاری پاراستنیان لە نێو پێشکەوتووترین مۆدێلەکانیاندا جێگیر کردووە.

گووگڵ دەڵێت، چاودێریی لۆژیکی بیرکردنەوەی مۆدێلەکە دەکات بۆ ئەوەی لەو ئامانجە لادان نەکات کە بەکارهێنەران دەیانەوێت، کە ئەمە مەترسییەکە توێژەران بە "لادان و ناهاوئاهەنگی" ناوی دەبەن. ئەم پرسە گرنگییەکی زیاتری وەرگرت دوای ئەوەی کۆمپانیای ئۆپن ئەی ئای لە مانگی تەممووزدا ئاشکرای کرد کە دوو لە مۆدێلەکانی، لە کاتی هەڵسەنگاندنی ئاسایشی سایبەریدا، لە ژینگەی تاقیکردنەوەی داخراو بازیان داوە و سێرڤەرەکانی کۆمپانیای هەگین فەیس (Hugging Face)ـیان هاککرد.