رووداو دیجیتاڵ
ئاڵۆزییە دیپلۆماسییەکانی نێوان پاریس و تاران بەهۆی خۆپێشاندانی قوتابیانی ئامادەیی لە فەرەنسا روو لە هەڵکشان دەکەن؛ وەزارەتی دەرەوەی فەرەنسا باڵیۆزی ئێرانی بانگهێشت کرد و تۆمەتباری کرد بە بەڕێوەبردنی "کەمپینێکی زانیاریی چەواشەکارانە."
رۆژی چوارشەممە، 7ی تشرینی یەکەمی 2026، وەزارەتی دەرەوەی فەرەنسا محەممەد ئەمیننەژاد، باڵیۆزی ئێرانی لە پاریس بانگهێشت کرد و لە راگەیێندراوێکدا رایگەیاند: "بە باڵیۆزی ئێرانمان راگەیاندووە کە ئەو ناوەڕۆکە چەواشەکارانەی لەلایەن هەژمارە فەرمییەکانی سەر بە وەزارەتی دەرەوەی ئێرانەوە لە تۆڕە کۆمەڵایەتییەکاندا بڵاودەکرێنەوە، بە تەواوی قبووڵنەکراوە."
ئەم هەنگاوەی پاریس وەڵامێک بوو بۆ تاران؛ کاتێک رۆژی سێشەممە وەزارەتی دەرەوەی ئێران پیر کۆچارد، باڵیۆزی فەرەنسای بانگهێشت کردبوو و ناڕەزایەتیی خۆی دەربڕیبوو بەرامبەر ئەوەی کە بە "مامەڵەی تووندوتیژانەی پۆلیسی فەرەنسا بەرامبەر خۆپێشاندەران" ناوی بردبوو.
ئەم گرژییە دیپلۆماسییە لە کاتێکدایە کە لە چەند رۆژی رابردوودا ناڕەزایەتی و خۆپێشاندانی فراوانی قوتابیانی قۆناخی ئامادەیی زۆربەی شارەکانی فەرەنسای گرتووەتەوە و گرژیی گەورەی لێکەوتووەتەوە. هێزە ئەمنییەکانی فەرەنساش بە گازی فرمێسکڕێژ و گوللەی پلاستیکی رووبەڕووی خۆپێشاندەران بوونەتەوە.
بەپێی ئامارە فەرمییەکانی حکومەتی فەرەنسا، زیاتر لە 6,500 کەس دەستگیرکراون، کە زۆرینەیان نەوجەوان و خوار 18 ساڵن، زیاتر لە 700 پۆلیس و 215 قوتابی بریندار بوون. هەروەها 24 قوتابخانە لە سەرانسەری وڵاتدا سووتێنراون یان تاڵان کراون.
