رووداو دیجیتاڵ
دۆناڵد ترەمپ، سەرۆکی ئەمریکا رایگەیاند، رووسیا و ئۆکراینا رازیبوون کە هێرشکردنە سەر ژێرخانی وزەی یەکدی رابگرن و ئاگربەستێکی نوێ لەو بوارەدا هاتووەتە ئاراوە.
رۆژی یەکشەممە، 11ی تشرینی یەکەم، ترەمپ لە پۆستێکی تۆڕی کۆمەڵایەتیی ترووس سۆشیاڵدا نووسیویەتی کە رێککەوتنەکە دەستبەجێ دەچێتە واری جێبەجێکردنەوە و داوای لە هەردوو لا کردووە پێوەی پابەند بن.
هەڵوێستی کیێڤ: "ئاگربەستەکە بۆ ئێمە هەواڵێکی نوێیە"
بەڵام ڤۆلۆدمیر زیلینسکی، سەرۆکی ئۆکراینا دەڵێت، ئەم ئاگربەستە بۆ ئەو، "هەواڵێکی نوێیە، بەڵام ئەگەر رووسیا بە ئاگربەستی وزە رازی بێت، ئەوا ئۆکرایناش رازییە."
راگەیاندنی "ئاگربەستی وزە" پێشکەوتنێکی دیپلۆماسیی زۆر گەورە دەبێت پێش هاتنی وەرزی زستان. بەڵام هێشتا روون نییە ئایا بەڕاستی رووسیا رازی بووە هێرشەکانی رابگرێت یان نا.
مانگی رابردووش ترەمپ هەواڵێکی هاوشێوەی راگەیاند، بەڵام هیچ کام لە لایەنەکانی جەنگەکە رێککەوتنەکەیان پشتڕاست نەکردەوە و هەردوو وڵاتیش بەردەوام بوون لە هێرشکردنە سەر ژێرخانی وزەی یەکدی.
هەڵکشانی ناکۆکییەکانی نێوان واشنتن و کیێڤ
لە کورتە چاوپێکەوتنێکدا دوای ئەم راگەیاندنەی ترەمپ، زیلینسکی بە پێگەی هەواڵی ئەکسیۆسی ئەمریکیی گوت: "ئەگەر سەرۆک ترەمپ لەگەڵ پووتین لەسەری رێککەوتووە، تکایە پێمان بڵێن کەی ئاگربەستەکە دەستپێدەکات. ئێمە ئامادەین و قبووڵیشی دەکەین."
ئەم راگەیاندنەی ترەمپ دوای چەند رۆژێک لە هەڵکشانی گرژییەکانی نێوان خۆی و زیلینسکی دێت، ئەوەش بەهۆی هێرشەکانی ئۆکراینا بۆ سەر پاڵاوگەکانی نەوتی رووسیا.
رۆژی هەینی ترەمپ رێککەوتنێکی بۆ سووککردنی سزاکانی سەر هەناردەی دیزڵی رووسیا راگەیاند، بە مەبەستی دابەزاندنی نرخی بەرزی سووتەمەنی لە ئەمریکا، ئەمەش ئۆکراینای تووڕە کرد. هەروەها رۆژی شەممە ترەمپ داوای لە ئۆکراینا کرد زیلینسکی بگۆڕن و تۆمەتباری کرد بەوەی دەرفەتەکانی کۆتاییهێنان بە جەنگ رەتدەکاتەوە.
مەرجی ئۆکراینا بۆ هەڵبژاردن و کاریگەریی قەیرانی وزە
رۆژی یەکشەممە زیلینسکی لە وەڵامدا بە کەناڵی ABCـی ئەمریکی راگەیاند، ئەگەر رووسیا رازی بێت بە ئاگربەستێکی 60 رۆژە، ئەوا ئۆکراینا هەڵبژاردن دەکات. هەروەها گوتی ئۆکراینا ئامادەیە هێرشەکانی بۆ سەر پاڵاوگەکانی رووسیا رابگرێت، ئەگەر مۆسکۆ هێرشەکانی بۆ سەر ژێرخانی وزەی ئۆکراینا بوەستێنێت.
جەنگی ئەمریکا لەگەڵ ئێران بووەتە هۆی بەرزبوونەوەی نرخی سووتەمەنی لە جیهاندا، ئەمەش گوشارەکانی سەر ترەمپی زیاتر کردووە تاوەکو چارەسەرێک بۆ دابەزاندنی نرخەکان بۆ بەکاربەرانی ئەمریکی بدۆزێتەوە.
