رووداو دیجیتاڵ
لە کاتێکدا هەرێمی نوۆردڕاین ڤێستفالن لە ئەڵمانیا وەک ناوەندێکی فرەکلتووری و پێکەوەژیانی سەدان هەزار کۆچبەر دەناسرێت، لە رۆژهەڵاتی وڵاتەکە و بەتایبەت لە هەرێمی ساکسۆنیا-ئەنهاڵت، باهۆزێکی سیاسی هەڵیکردووە. بۆ یەکەمجار لە مێژووی ئەڵمانیای نوێدا، پیاوێک لە پارتی راستڕۆی توندڕۆی "ئەڵتەرناتیڤ بۆ ئەڵمانیا" (AfD) بووە سەرۆکی پەرلەمانی هەرێمەکە.
ئەم پێشهاتە، کە لەلایەن هەندێکەوە بە "رۆژێکی ڕەش بۆ دیموکراسیی ئەڵمانیا" ناودەبرێت، ئەو بەربەستە سیاسییەی شکاندووە کە پارتە دیموکراتەکانی ئەڵمانیا ساڵانێک بوو بۆ دوورخستنەوەی توندڕۆکان دروستیان کردبوو. ئێستا کۆچبەران بە نیگەرانییەوە دەپرسن، ئایا ئەمە سەرەتای کۆتاییەکە یان کۆتایی سەرەتایەکە؟
رێنێ مویلەر، پارێزەرێکی ئەڵمانی، دەڵێت ئەم دۆخە "مرۆڤ تووشی نیگەرانییەکی گەورە دەکات." ئەو دەشڵێت: "پەرلەمان ماڵی دیموکراسییە و بوونی نوێنەرێکی نادیموکراسی لە سەرکردایەتیی پەرلەماندا پەیامێکی باش نییە. ترسم هەیە لە کەمبوونەوەی لێبوردەیی، ئازادیی کەمتر، پارێزراویی کەمتر و دیموکراسیی کەمتر."
ترس و نیگەرانییەکە گەیشتووەتە نێو ماڵی کۆچبەرانیش. هەندرێن و رۆشەن، دوو ژنە کوردی خەڵکی رۆژئاوای کوردستانن کە ماوەی 30 ساڵە لە ئەڵمانیا دەژین و لە شاری دوسلدۆرف چێشتخانەیەک بەڕێوە دەبەن. ئەوان ئێستا لە داهاتووی خۆیان دەترسن و دەڵێن: "ئەگەر دۆخەکە ئاوا بڕوات، ئەڵمانیا بەجێدەهێڵین."
پارتی (AfD)، کە دژایەتیی کۆچبەران دەکات، ئێستا گەورەترین هێزی ئۆپۆزسیۆنە لە پەرلەمانی فیدراڵی و لە هەڵبژاردنەکاندا بەردەوام بەهێزتر دەبێت. لایەنگرانی پێیانوایە ئەمە کۆتاییهێنانە بە گۆشەگیریی سیاسییان، بەڵام پارتەکانی دیکە هۆشداری دەدەن و دەڵێن، "ئەف-دی هاتووە بۆ ئەوەی بڕبڕەی پشتی دیموکراسی لەم وڵاتەدا بشکێنێت."
