رووداو دیجیتاڵ
ئیمانوێل ماکرۆن، سەرۆککۆماری فەرەنسا دەستلەکارکێشانەوەی لۆران نونێز، وەزیری ناوخۆی وڵاتەکەی رەتکردەوە کە لە دوای ئاڵۆزبوونی خۆپێشاندانەکان پێشکێشی کردبوو.
ئەمڕۆ دووشەممە، 19ی تشرینی یەکەمی 2026، کۆشکی (ئێلیزێ) لە راگەیێندراوێکدا گوتی، وەزیری ناوخۆ رۆژی یەکشەممە دەستلەکارکێشانەوەی خۆی پێشکێشی سەرۆککۆمار کرد، بەڵام ماکرۆن بەهۆی پێویستیی مانەوەی سەرکردایەتیی هێزەکانی جێبەجێکردنی یاسا لەم قۆناخەدا داواکارییەکەی رەتکردووەتەوە.
بەپێی راگەیێندراوەکەی سەرۆکایەتیی فەرەنسا، ماکرۆن داوای لە وەزیری ناوخۆ کردووە هەموو رێکارێکی پێویست بگرێتەبەر بۆ نەهێشتنی ئەو کەموکوڕییانەی لە پلاندانان و زانیارییە هەواڵگرییەکاندا هەبوون و رێگەیان خۆشکرد بۆ سەرهەڵدانی تووندوتیژی.
سەرۆککۆماری فەرەنسا جەختی کردەوە دەبێ دەستبەجێ شێوازی نوێی کارکردن و مامەڵە بۆ هێزە ئەمنییەکان دابنرێ تاوەکو کۆنترۆڵی قەیرانەکە بکەن و دڵنیاببنەوە لەوەی رووداوی لەو شێوەیە دووبارە نابێتەوە.
رەتکردنەوەی دەستلەکارکێشانەوەی وەزیری ناوخۆ لە کاتێکدایە، فەرەنسا چەند رۆژێک بوو بە دەست شەپۆلێکی بەرفراوانی ناڕەزایەتیی خوێندکاران و سەندیکاکانەوە دەیناڵاند دژ بە دۆخی پەروەردە و بژێوی.
خۆپێشاندانەکانی رۆژی شەممە لە چەندین شار پەلی بۆ تووندوتیژی و تاڵانکردن هاویشت، بە جۆرێک بەپێی فیدراسیۆنی بازرگانیی فەرەنسا نزیکەی 1,500 دووکان زیانیان بەرکەوت و زیانە داراییەکانیش بە چەند سەت ملیۆن یۆرۆ دەخەمڵێندرێن؛ هەروەها پۆلیس زیاتر لە 1,800 کەسی لە شارە جیاوازەکاندا دەستگیر کردووە.
