رووداو دیجیتاڵ
وەزارەتی گەنجینەی ئەمریکا سزای بەسەر تۆڕێکی کۆمپانیا، دامەزراوەی کەشتیوانی و کەشتی بارهەڵگردا سەپاند کە گوایە ساڵانە لە رێگەی گواستنەوەی نەوت، مادەی پیترۆکیمیایی و پۆڵاوە سەتان ملیۆن دۆلار بۆ سوپای پاسداران و بەرنامە سەربازی و ئەتۆمییەکانی تاران دابین دەکەن.
رۆژی چوارشەممە، 21ی تشرینی یەکەمی 2026، سکۆت بێسێنت، وەزیری گەنجینەی ئەمریکا لە راگەیێندراوێکدا سەبارەت بەو سزایانە رایگەیاند، "چ لە دەریادا خەریکی گواستنەوەی نایاسایی نەوت بن یان لە نووسینگەیەکی کۆمپانیایەکی یاساییدا دانیشتبن، ئەگەر هاوکاریی رژێمی ئێران بکەن، دەستمان پێتان دەگات و سزاتان دەدەین. دەبێت هەڵبژاردنێک بکەن: لەگەڵ ئێمەن یان دژمانن."
بەپێی بەڵگەنامەکانی وەزارەتی گەنجینە، کۆمپانیای کارناکیس کە بنکەکانی لە پاناما و یۆنانە، چەندین ساڵە خزمەتگوزاریی یاسایی پێشکێش بە بازرگانانی پەیوەندیدار بە ئێران دەکات تاوەکو کۆمپانیای وەهمی دروستبکات بۆ شاردنەوەی خاوەندارێتیی ئەو کەشتییانەی بەرهەمە قەدەخەکراوەکانی ئێران دەگوازنەوە.
لە راگەیێندراوەکەی وەزارەتی گەنجینەدا هاتووە، "ئەم کۆمپانیا یاساییە ژێرخانی سەرەکیی کۆمپانیاکانی سەید ئەسەدوڵڵا ئیمامجومعە (ملیاردێری گازی شلی ئێران) و کۆمپانیای قاتیڕجیی سووریای دامەزراندووە، کە دووەمیان وەک کەناڵێکی دارایی سەرەکی بۆ فەیلەقی قودسی سوپای پاسداران و حووسییەکان کاری کردووە. لەسەر ئەم بنەمایە، هەردوو خاوەنی کۆمپانیاکە سۆفیانۆسکارناکیس کۆسماس و کۆنستانتینۆس کارناکیس کۆسماس کە هەڵگری وڵاتینامەی یۆنانی و پەنەمان، هاوشانی سێ لە کارمەندانیان، خرانە لیستی سزاکانەوە، چونکە ناوی خۆیان وەک بەڕێوەبەری کۆمپانیا وەهمییەکان بەکارهێناوە".
واشنتن تەنیا سەرنجی لەسەر نەوتی ئێران نییە، بەڵکو کەشتیی بارهەڵگری ئاسایی بۆ گواستنەوەی پۆڵا و بەرهەمە پترۆکیمیاییەکانیش سزادەدات. لەم چوارچێوەیەدا، کۆمپانیای بەڕێوەبردنی کەشتیوانیی رۆکسێت لە پەنەما و یۆنان سزادرا.
حەوت کەشتیی بارهەڵگری گەورەی هەڵگری ئاڵای پەنەما کە لەلایەن ئەم کۆمپانیایەوە بەڕێوەدەبرێن، بلۆک کران. لەوانە کەشتییەکانی ئەنیمۆس، گلۆریس، پڕاید، دیستینی، فلامینگۆ1، هارمۆنی و پرێنس.
بریکارەکانی کەشتیوانی لە سەنگاپوور و ئیمارات
بەشێکی دیکەی سزاکان بریکارەکانی کەشتیوانییان گرتەوە کە رێگەخۆشکەر بوون بۆ کەشتییە ئێرانییەکان لە بەندەرە نێودەوڵەتییەکان:
کۆمپانیای ئەمیگۆز کە کۆمپانیایەکی سەنگاپوورییە و هاوکاریی گواستنەوەی باری نەوتی خاوی بۆ کۆمپانیاکانی سەر بە سوپای ئێران کردووە و سووتەمەنی بۆ کەشتییە سزادراوەکان دابینکردووە، هەروەها پەیوەندی بە تۆڕەکەی محەممەد حوسێن شەمخانییەوە هەبووە.
کۆمپانیای وەیڵز کە کۆمپانیایەکی لۆجستییە لە دووبەی و وەک بریکار بۆ کڕینی دەیان ملیۆن دۆلار کەرەستەی پترۆکیمیایی بۆ ئێران کاری کردووە، هەروەها دوو کەشتیی پشتیوانیی سەر بە کۆمپانیاکە وەیڵز دایەمۆند و وەیڵز پیراڵ خرانە نێو لیستی سزاکانەوە.
لێکۆڵینەوە لە بانکێکی یۆنانی و لێکەوتە داراییەکان
تۆڕی بەرەنگاربوونەوەی تاوانە داراییەکانی ئەمریکا سەر بە وەزارەتی گەنجینەی وڵاتەکە دەڵێت، بە هاوئاهەنگی هاوبەشە ئەورووپییەکان، فەرمانی لێکۆڵینەوەی بۆ بانکێکی یۆنانی دەرکردووە بەهۆی گومانی بوونی پەیوەندی لەگەڵ ئێران و گرووپە چەکدارەکانی سەر بە تاران.
بەپێی یاساکانی گەنجینەی ئەمریکا، سەرجەم ماڵ و سامان و بەرژەوەندییە داراییەکانی ئەم کەس و کۆمپانیایانە لە ئەمریکا دەستیان بەسەردا دەگیرێ و هەر لایەن یان بانکێکی بیانی مامەڵەی داراییان لەگەڵدا بکات، رووبەڕووی سزای تووندی لاوەکی و بێبەشبوون لە سیستەمی دارایی ئەمریکا دەبێتەوە.
