رووداو دیجیتاڵ
ڤلادیمیر پووتین، سەرۆکی رووسیا رۆژی چوارشەممە ستایشی ئیلۆن مەسک، ملیاردێر و خاوەنی کۆمپانیای سپەیس ئێکسی کرد و بە "کەسێکی بلیمەت" ناوزەندی کرد، هەروەها گوتی، سەرەڕای ئاڵۆزییە سیاسییەکان، مۆسکۆ پەیوەندی و هاوئاهەنگیی نزیکی لەگەڵ مەسکدا هەیە.
ئەم لێدوانانەی پووتین لە پەراوێزی سەردانەکەیدا هات بۆ پێشانگەی "پلاتفۆرمی گەشەپێدانی سەروەری: چارەسەرە پێشکەوتووەکانی رووسیا لە کەرتە سەرەکییە ئابووری و کۆمەڵایەتییەکاندا"، کە لە پەراوێزی سێیەمین لووتکەی رووسیا-ئەفریقا لە مۆسکۆ بەڕێوەچوو.
پووتین لە کاتی بەسەرکردنەوەی پێشانگەکەدا و لە وەڵامی پرسیارێک سەبارەت بە مانگە دەستکردەکان رایگەیاند: "ئیلۆن مەسک بلیمەتە، ئەو بەڕاستی کەسێکی بلیمەتە. زیاتر لە 5,000 مانگی دەستکردی لە خولگەدا هەیە، لە کاتێکدا ئێمە تازە لە قۆناخی یەکەمی هەنگاوەکانمانداین، بەڵام ئێمە شانازی بەوەوە دەکەین کە دەستمان پێکردووە و بە توانای سەربەخۆی خۆمان دەستمان پێکردووە."
سەرۆکی رووسیا هەروەها تیشکی خستە سەر هاوئاهەنگییە بەردەوامەکانی نێوان مۆسکۆ و واشنتن لە بواری بۆشایی ئاسماندا و گوتی: "ئێمە لە پەیوەندییەکی نزیکداین لەگەڵ هاوبەشە ئەمریکییەکانمان، لە نێویاندا بەڕێز مەسک؛ چونکە لە خولگەی زەویدا زۆر گرنگە رێگری لە یەکدی نەکەین، پابەندی رێساکان بین و سیستم بپارێزین. هەم ئێمە و هەم هاوبەشە ئەمریکییەکانمان بەهای ئەمە دەزانین و سەرەڕای هەموو کێشە سیاسییەکان، بە نزیکی پێکەوە کار دەکەین."
ستایشکردنی ئیلۆن مەسک لەلایەن ڤلادیمیر پووتینەوە پەیوەندییەکی راستەوخۆی بە هەڵوێستە مشتومڕاوییەکانی مەسکەوە هەیە سەبارەت بە جەنگی ئۆکراینا، بەتایبەت بڕیاری مەسک لە سنووردارکردن و پچڕاندنی خزمەتگوزاریی هێڵی ئینتەرنێتی مانگە دەستکردەکانی ستارلینک لە ناوچەکانی ژێر دەسەڵاتی ئۆکراینادا. کاتێک هێزەکانی ئۆکراینا لە نزیک نیمچەدوورگەی کریمیا هەوڵی هێرشێکی گەورەی درۆنییان دژ بە کەشتیگەلی دەریای رەشی رووسیا دا، مەسک رەتیکردەوە تۆڕی ستارلینک لەو سنوورەدا چالاک بکات و بەمەش هێرشەکەی پەکخست، بە بیانووی ئەوەی نایەوێت کۆمپانیاکەی ببێتە بەشێک لە پەرەسەندنی جەنگێکی ئەتۆمیی جیهانی.
ئەم دەستوەردانە تەکنەلۆژییەی مەسک وایکردووە پووتین وەک کارەکتەرێکی سەربەخۆ لە سیاسەتە رەهاکانی کۆشکی سپی سەیری بکات، لە کاتێکدا کیێڤ و هاوپەیمانە رۆژئاواییەکانی بە توندی رەخنەیان لێگرت و تۆمەتباریان کرد بە خزمەتکردنی بەرژەوەندییەکانی مۆسکۆ.
