رووداو دیجیتاڵ
هێرشی فڕۆکە جەنگییەکانی ئەمریکا و ئیسرائیل بۆسەر ئێران بەردەوامە و ئەمڕۆ لە سێیەم رۆژی شەڕەکەدا ژمارەیەک لە بنکە و بارەگاکانی سوپای پاسداران و هێزە ئەمنییەکانی دیکەی کۆماری ئیسلامی لە رۆژهەڵاتی کوردستان کرانە ئامانج.
8 هێرشی ئاسمانی کرانە سەر سنە
لە بەیانیی ئەمڕۆ دووشەممەوە 8 هێرشی ئاسمانی کراونەتە سەر بنکە و بارەگاکانی سوپا و هێزە ئەمنییەکانی دیکەی ئێران لە شاری سنە.
سەر لەبەیانی ئەمڕۆ، دوای 6 هێرشی یەک لە دوای یەک، قایمقامی سنە رایگەیاند، لانیکەم 3 هاونیشتمانی کوژران.
دواتر لە دوو هێرشی جیاوازدا دوو ناوچە لە نزیک چیای ئاویەری سنە کرانە ئامانج.
لە سنە لەم شوێنانە دراوە:
فیرقەی 28ی ئەرتەش
فەرماندەیی شەهرامفەری ئیتڵاعات لە بلوار شبلی لە سنە
فەرمانگەی وەزارەتی ئیتڵاعات
بنکەی پۆلیسی شاڵمان لەنێو سنە
بنکەی پۆلیسی 25 لەنێو سنە
بنکەی بەسیج لە بان باشگا- شەقامی فێردەوسی لە سنە
دەسەڵاتی دادوەری لە سنە
فڕۆکەخانەی سنە
هێرشی ئاسمانی کرایە سەر بارەگای سوپای پاسداران لە شاری مەریوان
لە لایەکی دیکەوە دوای نیوەڕۆی ئەمڕۆ، فڕۆکەکانی ئەمریکا و ئیسرائیل بنکەی سەرەکیی سوپای پاسدارانیان لە مەریوان کردە ئامانج کە دەکەوێتە ناوەندی شارەکە.
سەرچاوەیەک لە شاری مەریوان بە رووداوی راگەیاند، چەند فڕۆکەیەک بارەگای سوپایان لە مەریوان بۆردوومانکرد و بەو هۆیەوە نێوشار بەتەواوی شڵەژا.
ئەو سەرچاوەیە دەڵێت، هێرشەکە 14: 13 خولەک ئەنجامدرا و ژمارەیەکی زۆر ئەمبووڵانس چوونە شوێنی رووداوەکە؛ ئاماژەی بەوەشکرد، هێزێکی زۆری ئەمنی بە چەکەوە لەنێو شارەکە بڵاوەیان پێکراوە.
سەرچاوەکە گوتی، دوای هێرشەکە ژمارەیەک لە هاونیشتمانییان مەریوانیان جێهێشت و بەرەو گوندەکان دەڕۆن و دەنگی فڕۆکەش لە مەریوان دەبیسترێت.
هێرشکردنە سەر بارەگای ئیتڵاعات لە مهاباد
هەر ئەمڕۆ ژمارەیەک لە پێگە و ناوەندەکانی سە بە سوپای پاسداران و ئیتڵاعات و هێزە ئەمنییەکانی دیکە لە پارێزگای ورمێی رۆژهەڵاتی کوردستان بۆردوومان کران.
سەرچاوەیەک لە مهابادەوە بە رووداوی گوت، ئەمڕۆ ئیدارەی ئیتڵاعاتی ئەو شارە بۆردوومان کراوە.
سەرچاوەیەکیش لە نەخۆشخانەی مهابادەوە بە تۆڕی میدیایی رووداوی گوت، لە هێرشەکەی سەر ئیدارەی ئیتلاعاتی مهاباد 4 کەس کوژراون و 22 کەس بە سەختی بریندارن بوون.
هەر لە سنووری پارێزگای ورمێ، رۆژانی شەممە و یەکشەممە لانیکەم 7 ناوەندی سەربازی و ئەمنی لە ورمێ و دەوروبەری کرانە ئامانج.
هێرشەکان هەریەک لە سەربازگەکانی ئەلمەهدی و مالیک ئەشتەری سەر بە سوپای پاسداران، فەرماندەیی یەکەی تایبەتی هێزە ئەمنییەکان، کۆگای تەقەمەنیی گۆڵمانخانە، فڕۆکەخانەی ورمێ، بنکەی مووشەکیی سوپای پاسداران و بارەگای فەرماندەیی پاسەوانی سنووری پارێزگاکەیان گرتووەتەوە.
سەرچاوە فەرمییەکان کوژرانی چوار کارمەندی هێزە ئەمنییەکانیان لە ئەنجامی ئەو هێرشانەدا راگەیاندووە.
هاوکات دانیشتووانی ناوچەکە ئاماژە بەوە دەکەن کە تاوەکو بەیانیی ئەمڕۆ دەنگی فڕۆکە جەنگییەکان و تەقینەوەی یەک لەدوای یەک بیستراوە و دووکەڵێکی چڕ ئاسمانی ورمێی گرتووەتەوە.
بەخاکسپاردنی 22 ئەندامی پاسەوانی سنوور لە ئیلام
بەیانی ئەمڕۆ لە رێوڕەسمێکی جەماوەرییدا، تەرمی 22 ئەندامی هێزەکانی پاسەوانی سنووری ئێران لە شاری ئیلامی رۆژهەڵاتی کوردستان بە خاک سپێردران کە لە هێرشێکی ئاسمانییدا گیانیان لەدەستدابوو.
ئەو 22 کەسە لە ئەنجامی هێرشێکی ئاسمانیی بۆ سەر بنکەیەکی پاسەوانی سنووری ئێران لە مێهران گیانیان لەدەستدابوو.
کوژرانی سێ ئەندامی سوپای پاسداران لە لوڕستان
پەیوەندییە گشتییەکانی سوپای پاسداران لە پارێزگای لوڕستان رایگەیاند، سێ ئەندامیان لە ئەنجامی هێرشە ئاسمانییەکانی ئەمریکا و ئیسرائیل بۆ سەر یەکێک لە بنکەکانی ئەو پارێزگایە کوژراون.
سوپای پاسداران ناوی ئەو سێ ئەندامەی بڵاوکردووەتەوە کە لەو هێرشەدا گیانیان لەدەستداوە و بریتین لە "سەید محەممەد سادق حەیات ئەلغەیبی، سەید عەممار سەجادی و سەجاد مەنسووری."
بە پێی بەدواداچوونەکانی رووداو، ژمارەیەکی زۆر پێگە و ناوەندی سەر بە سوپای پاسداران لە سنووری شارەکانی مهاباد لە پارێزگای ورمێ، کامیاران لە پارێزگای سنە، روانسەر لە پارێزگای کرماشان، جوانڕۆ و پاوە و سەلاس باوەجانی لە کرماشان بۆردوومان کراون.
.jpg&w=3840&q=75)
