رووداو دیجیتاڵ
وەزارەتی تەندروستیی ئێران ئاماری وردی قوربانییانی هەفتەی یەکەمی شەڕی بڵاوکردەوە، کە تێیدا ژمارەیەکی زۆر ژن و منداڵ بوونەتە قوربانی. هاوکات لە پارێزگای ئەلبورزیش هێرش کرایە سەر کۆگایەکی نەوت و کوژراو و برینداری لێکەوتەوە.
بەپێی راگەیێندراوی فەرمیی وەزارەتی تەندروستیی ئێران، لە هەفتەی یەکەمی شەڕدا ئامارەکان بەو شێوەیە کە 198 ژن کوژراون و 1044 ژنی دیکەش بریندارن.
وەزارەتی تەندروستیی ئێران ئاماژەی بەوە کردووە، 190 کەس لە کوژراوەکان تەمەنیان لە خوار 18 ساڵە و لەو ژمارەیەش 6 منداڵیان تەمەنیان لە خوار 5 ساڵەوەیە.
بچووکترین کوژراو، بەپێی راگەیێندراوی وەزارەتەکە، کۆرپەیەکی کچی 8 مانگانە و بەتەمەنترینیش پیاوێکی 88 ساڵانە.
ئامارەکان ئاماژە بەوە دەدەن، 30%ی کۆی گشتیی کوژراوانی شەڕ منداڵن، ئەمەش نیشانەی چڕیی هێرشەکانە بۆ سەر ناوچە سڤیلەکان.
لە لایەکی دیکەوە، قودرەتوڵڵا سەیف، جێگری سیاسیی پارێزگاری ئەلبورز رایگەیاند، لە ئەنجامی هێرش بۆ سەر کۆگای نەوتی "فەردیس" 6 کەس گیانیان لەدەستداوە و 21 کەسی دیکەش بریندارن. بەرپرسە ئێرانییەکە ئاشکرای کرد، بەشێک لە قوربانییەکان هاووڵاتیی ئاسایی و دانیشتووانی دەوروبەری کۆگاکە بوون.
لەبارەی دۆخی سووتەمەنییەوە، جێگری سیاسیی پارێزگاری ئەلبورز جەختی کردەوە، سەرەڕای زیانەکان، "تۆڕی دابینکردنی سووتەمەنی جێگیرە" و پێشبینی دەکرێت، ئاگری کۆگاکە لە چەند کاژێری داهاتوودا بە تەواوی بکوژێندرێتەوە.
