رووداو دیجیتاڵ
فەرماندەیی ناوەندیی هێزەکانی ئەمریکا – سێنتکۆم ئاماری حەوت رۆژی یەکەمی جەنگی ئێران و وردەکاریی ئەو گورزانەی بەر ژێرخانی سەربازی و ئەمنیی کۆماری ئیسلامیی ئێران کەوتوون بڵاوکردەوە.
رۆژی شەممە، 07-03-2026، سێنتکۆم گوتی، ئۆپەراسیۆنەکە بە فەرمانی راستەوخۆی سەرۆکی ئەمریکا، لە کاژێر 1:15ـی بەیانیی رۆژی 28-02-2026 دەستی پێکردووە. جوگرافیای ئۆپراسیۆنەکەش تەواوی خاکی ئێرانی گرتووەتەوە.
ئامارە سەرەکییەکان بە ژمارە
• کۆی ئامانجە پێکراوەکان: زیاتر لە 3,000 ئامانج لە ناو خاکی ئێراندا بۆردوومان کراون.
• زیانە دەریاییەکان: 43 کەشتیی جەنگیی ئێران بە تەواوەتی تێکشکێنراون یان زیانی قورسیان بەرکەوتووە.
جۆری ئەو ئامانجانەی کراونەتە ئامانج
سوپای ئەمریکا جەختی کردووەتەوە، هێرشەکان بە مەبەستی هەڵوەشاندنەوەی دەزگە ئەمنییەکانی ئێران بووە و خاڵی لەپێشینە دراوە بەو شوێنانەی هەڕەشەی دەستبەجێیان دروست کردووە، لەوانە:
1. ناوەندەکانی فەرماندەیی و کۆنتڕۆڵ.
2. بارەگا هاوبەشەکانی سوپای پاسداران (IRGC).
3. بارەگای هێزە ئاسمانییەکانی سوپای پاسداران.
4. سیستمە تێکەڵەکانی بەرگریی ئاسمانی.
5. بنکەکانی مووشەکی بالیستی.
6. کەشتی و ژێردەریاییەکانی هێزی دەریایی ئێران.
7. پێگەکانی مووشەکی دژە کەشتی.
8. تواناکانی پەیوەندیی سەربازی.
ئەو کەرەستە و چەکانەی ئەمریکا بەکاریهێناون
ئەم ئۆپەراسیۆنە یەکێکە لە گەورەترین ئۆپەراسیۆنە ئاسمانی و دەریاییەکان، کە تێیدا ئەمریکا چەندین جۆر چەکی پێشکەوتووی بەکارهێناوە:
• فڕۆکە بۆمبهاوێژەکان: جۆری بی-1 و بی-2.
• فڕۆکە جەنگییەکان: فڕۆکەی هێرشبەری ئەی-10، هەروەها ئێف35، ئێف22، ئێف15، ئێف16 و ئێف18.
• درۆنەکان: درۆنی جۆری لوکاس و ئێم کیو-9 ریپەر.
• سیستمی بەرگری: سیستمی پاتریۆت، تاد و هیمارس.
• هێزی دەریایی: کەشتییە فڕۆکەهەڵگرە ئەتۆمییەکان و کەشتییە تێکشکێنەرەکانی هەڵگری مووشەکی رێنماییکراو.
• پشتگیریی لۆجیستی: فڕۆکەی پشکنینی ئارسی-135، فڕۆکەی چاودێریی دەریایی پی-8، فڕۆکەکانی گواستنەوەی سی17 و سی130، هەروەها فڕۆکەکانی دابینکردنی سووتەمەنی.
سێنتکۆم لە کۆتایی راپۆرتەکەیدا ئاماژەی بەوە کردووە، جیا لەم کەرەستە دیارانە، "توانای تایبەتی" دیکەیان بەکارهێناوە، کە بەهۆی پاراستنی نهێنییە سەربازییەکانەوە ناتوانن لە لیستەکەدا ناویان بهێنن.
