رووداو - دیجیتاڵ
بڕیارەکەی وەزارەتی سامانە سرووشتییەکان بۆ دابەزاندنی نرخی بەنزینی نۆرماڵ بۆ 850 دینار، لە زۆرینەی بەنزینخانەکانی هەولێر و دهۆک چووە واری جێبەجێکردنەوە. بەڵام لە سلێمانی و هەڵەبجە نرخەکان هێشتا وەک خۆیان ماونەتەوە و خاوەن بەنزینخانەکانیش دەڵێن، تاوەکو بەنزینی هەرزانمان پێنەگات ناتوانین نرخەکان دابەزێنین.
دابەزینی نرخەکە بۆ 850 دینار تەنیا جۆری نۆرماڵ دەگرێتەوە، کە نزیکەی 60%ـی شۆفێران بەکاری دەهێنن. عوسمان رەحیم، شۆفێرێکی ئۆتۆمبێلی تایبەتە و دەڵێت: "گرانیی بەنزین وای لێکردبووین بیر لە کڕینی پاسکیل بکەینەوە بۆ هاتووچۆ، چونکە تێچووەکەی زۆر بوو." هەروەها دیار فارس، شۆفێری تاکسی ئاماژە بەوە دەکات کە کێشەی ئەوان لەگەڵ سەرنشینەکانە؛ "کاتێک بەهۆی گرانیی بەنزینەوە کرێیەک زیاد دەکەین، سەرنشین دەڵێت کێشەی من نییە."
دۆخی بەنزینخانەکان لە پارێزگاکان: لە هەولێر و دهۆک نزیکەی 500 بەنزینخانە هەن و زۆرینەیان پابەندی نرخە نوێیەکە بوون، حکومەتیش هۆشداری داوە هەر شوێنێک پابەند نەبێت سزادەدرێت. لە بەرامبەردا، لە سلێمانی و هەڵەبجە و ئیدارە سەربەخۆکانی ئەو سنوورە کە نزیکەی 400 بەنزینخانەن، نرخەکان هێشتا وەک پێشتر ماونەتەوە.
بەهمەن شێخ قادر، گوتەبێژی بەنزینخانەکانی سلێمانی بە رووداوی راگەیاند: "ئێمە لەگەڵ بڕیارەکەین، بەڵام چاوەڕێین بەنزینمان بە نرخی 820 بۆ 830 دینار پێبگات، ئەوکات دەتوانین بە 850 دینار بیفرۆشینەوە و پابەند دەبین."
بەراوردی نرخەکان لە نێوان شارەکان:
- هەولێر و دهۆک:
- نۆرماڵ: 850 دینار.
- محەسەن و سوپەر: نزیکەی 2,000 دینار.
- سلێمانی و هەڵەبجە:
- نۆرماڵ: 1,150 دینار.
- محەسەن و سوپەر: نزیکەی 1,500 دینار.
سەرەڕای دابەزینی نرخی نۆرماڵ لە هەولێر و دهۆک، بەڵام هێشتا 40%ـی شۆفێران کە ئۆتۆمبێلەکانیان پێویستی بە بەنزینی کوالێتی بەرز هەیە (محەسەن و سوپەر)، سوودمەند نەبوون، چونکە نرخی ئەو دوو جۆرە لە هەولێر و دهۆک گرانترە لە سلێمانی و هەڵەبجە و گەیشتووەتە نزیکەی دوو هەزار دینار. شۆفێران داوا دەکەن بڕیارەکە هەموو جۆرەکانی بەنزین بگرێتەوە تاوەکو بارگرانیی دارایی لەسەر هەمووان کەمببێتەوە.
