رووداو - دیجیتاڵ
رووداوێکی دڵتەزێن لە رەواندز؛ گەنجێکی 26 ساڵان بە ئۆتۆمبێلەکەیەوە لە بەرزیی زیاتر لە 300 مەترەوە کەوتە نێو خەرەندی رەواندز و دەستبەجێ گیانی لەدەست دا. بەپێی دیمەنەکانی کامێرای چاودێری، ئۆتۆمبێلەکە بە خێراییەکی زۆر لە پێچەکە لایداوە و هیچ هۆکارێکی دەرەکی لە پشت رووداوەکە نەبووە.
رووداوەکە لەسەر رێگەی رەواندز - سۆران روویدا. هەندرێن رەمەزان، تەمەن 26 ساڵ، شۆفێری ئۆتۆمبێلەکە بوو کە بەهۆی توندیی کەوتنەخوارەوەکەیەوە دەستبەجێ گیانی لەدەست دا. بورهان قادر، شایەتحاڵێکی رووداوەکەیە و بە رووداوی راگەیاند: "دەنگێکی گەورە هات وەک تەقینەوەی روومانە، وامزانی مۆلیدە تەقیوە، بەڵام دواتر کرێکارێک هات و گوتی ئۆتۆمبێلێک لەو بەرزییەوە کەوتووەتە نێو خەرەند."
تەرمەکە بە زەحمەتێکی زۆر دەرهێنراوەتەوە بەهۆی سەختی و قووڵیی خەرەندی رەواندز، تیمەکانی بەرگریی شارستانی و پۆلیس بە هاوکاریی خەڵکێکی زۆر توانییان تەرمەکە دەربهێننەوە. ئیسماعیل وەرتی، هاونیشتمانییەک کە بەشداری هێنانەوەی تەرمەکەی کردووە، دەڵێت: "شوێنەکە زۆر سەخت بوو، کاتێک گەیشتینە لای ئۆتۆمبێلەکە شۆفێرەکە گیانی لەدەستدابوو. رێک لەو کاتەی کەوتووەتە خوارەوە مردووە."
کێشەی سەلامەتی لە شوێنی رووداوەکە ئەو شوێنەی ئۆتۆمبێلەکە لێی هەڵدێراوە، موڵکێکی تاپۆیە و خاوەنەکەی لە سەرەتای ئەمساڵەوە بۆ مەبەستی دروستکردنی باڵەخانەیەک تەختی کردووە و بەربەستەکانی لاداوە. چیا محەممەد، سەرۆکی شارەوانیی رەواندز لەو بارەیەوە بە رووداوی گوت: "پێشتر ئەو شوێنە بەربەستی هەبووە و باخ بووە، بەڵام هاونیشتمانییەک مۆڵەتی بینای وەرگرتووە و کاری تێدا دەکات. بەپێی رێنماییەکان، هەر کەسێک کار لە شوێنێک بکات، دەبێت پابەندی رێنماییەکانی سەلامەتی بێت."
مێژوویەکی تاڵ لە هەمان شوێن ئەمە یەکەم رووداوی لەم جۆرە نییە لەو ناوچەیە؛ خەرەندی رەواندز بە یەکێک لە مەترسیدارترین ناوچە شاخاوییەکان دادەنرێت. لە ساڵی 2011 شدا لە هەمان شوێندا ئۆتۆمبێلێک هەڵدێرا و بەهۆیەوە پێنج سەرنشین گیانیان لەدەست دا.
زانیارییەکان بە کورتی:
- قوربانی: هەندرێن رەمەزان (26 ساڵ).
- بەرزیی هەڵدێران: زیاتر لە 300 مەتر.
- شوێن: خەرەندی رەواندز.
- هۆکار: خێرایی زۆر و نەمانی بەربەستی سەلامەتی لە شوێنی کارکردن.
