رووداو دیجیتاڵ
مەکتەبی سیاسیی یەکێتیی نیشتمانیی کوردستان، بەبۆنەی یادی 80 ساڵەی دامەزراندنی پارتی دیموکراتی کوردستان، پەیامێکی پیرۆزبایی ئاراستەی مەکتەبی سیاسیی ئەو پارتە کرد و ئومێد دەخوازێت ئامانجە نەتەوەییەکان بکرێنە بنەما بۆ تێپەڕاندنی ئەو بارودۆخەی رووی لە ناوچەکە کردووە.
لە پەیامەکەدا کە رۆژی شەممە، 15ـی ئابی 2026 بڵاوکراوەتەوە، مەکتەبی سیاسیی یەکێتی پیرۆزبایی ئاراستەی ئەندام و لایەنگرانی پارتی کردووە و نووسیویەتی: "ئومێدەوارین خەباتی هەموو لایەک ئامانجە نەتەوەیی و دیموکراسییەکان بکاتە بنەما بۆ تێپەڕاندنی ئەم بارودۆخەی رووی لە کوردستان و ناوچەکەمان کردووە."
یەکێتیی لە پەیامەکەیدا بۆ پارتی جەخت لەوەش دەکاتەوە کە پێویستە ئەو هەنگاوانە "لەپێناو پایەدارکردن و راستکردنەوەی بەرپرسیارانەی رێڕەوی ئەزموونەکەمان" بن.
رۆژی 16ـی ئابی 2026، 80ـەمین ساڵیادی دامەزراندنی پارتی دیموکراتی کوردستانە، بەو بۆنەیەوە مەکتەبی سیاسیی پارتەکە راگەیێندراوێکی بڵاوکردەوە و رایگەیاند: "پاراستنی دەستکەوتەکان و دوورخستنەوەی هەرێمی کوردستان لە گرژی و شەڕ و پێکدادانەکانی دەوروبەر، بەرپرسیارێتییەکی نەتەوەیی و نیشتمانییە"؛ هەروەها جەختی لەوە کردووەتەوە: "رێگاگرتن لەوەی کوردستان ببێتە شوێنێک بۆ کاریگەری خستنە سەر ئەمنیەتی دراوسێکانمان و رێزگرتنی دوولایەنەی بەرژەوەندییەکان."
دەقی راگەیێندراوەکەی یەکێتی
بەڕێز مەكتەبی سیاسی پارتی دیموكراتی كوردستان
بە بۆنەی یادی هەشتا ساڵەی دامەزراندنی پارتی دیموكراتی كوردستانەوە پیرۆزبایی لەبەڕێزتان و ئەندام و لایەنگرانتان دەكەین
لەم بۆنەیەدا ئومێدەوارین خەباتی هەموو لایەك ئامانجە نەتەوەیی و دیموكراسییەكان بکاتە بنەما بۆ تێپەڕاندنی ئەم بارودۆخەی ڕووی لە کوردستان و ناوچەكەمان كردوە. لەپێناو پایەدارکردن و راستکردنەوەی بەرپرسیارانەی رێڕەوی ئەزموونەکەمان.
جارێكی تر پیرۆزە
مەكتەبی سیاسی
یەكێتیی نیشتمانیی كوردستان
