رووداو دیجیتاڵ
جێگری پارێزگاری کرماشان دەڵێ، 14 ترلیۆن تمەن پارەی گەنمی جووتیارانی پارێزگاکە خەرج کراوە. بەڕێوەبەری کشتوکاڵی کرماشانیش دەڵێ، تاوەکو ئێستا زیاتر لە 673 هەزار تۆن گەنم وەرگیراوە.
حەسەن رۆستەمزاد، جێگری پارێزگاری کرماشانی رۆژهەڵاتی کوردستان رایگەیاند، تاوەکو دوێنێ یەکشەممە 16-08-2026، 14 ترلیۆن تمەن (74 ملیۆن و 964 هەزار دۆلار) پارەی گەنمی جووتیارانی پارێزگاکە خەرج کراوە..
وەک جێگری پارێزگاری کرماشان دەڵێ، کۆی شایستە داراییەکانی جووتیارانی پارێزگاکە بۆ گەنم نزیکەی 33 ترلیۆن تمەنە (176 ملیۆن و 660 هەزار دۆلار) کە ''پێشبینی دەکرێ تاوەکو هەفتەی داهاتوو پارەی خەرجکراو بگاتە نزیکەی 25 ترلیۆن (133 ملیۆن و 832 هەزار دۆلار) بۆ 30 ترلیۆن تمەن ( 160 ملیۆن و 560 هەزار دۆلار)''.
هاوکات سەعید کەرەمی، بەڕێوەبەری گشتیی کشتوکاڵی کرماشان ئاماژەی بەوە کرد، تاوەکو ئێستا 673 هەزار و 686 تۆن گەنمی جووتیارانی پارێزگاکە لە سایلۆکان وەرگیراوە.
سەعید کەرەمی ئەوەشی خستەڕوو، گەنمی وەرگیراو بۆ هەمان کاتی پار نزیکەی 573 هەزار تۆن بوو و ئەم ساڵ تاوەکو ئێستا 100 هەزار تۆن زیاتر وەرگیراوە.
ساڵانە لە کرماشان 800 هەزار بۆ ملیۆنێک تۆن گەنم بەرهەم دەهێنرێت و هەمووکات لە ریزبەندی پێنج پارێزگا یەکەمەکاندایە لەسەر ئاستی ئێران.
ئەم ساڵ لە کرماشان، کۆتاییەکانی مانگی ئایار دەست بە وەرگرتنی گەنمی جووتیاران کرا. ئەم وەرزە لەو پارێزگایەی رۆژهەڵاتی کوردستان نزیکەی 440 هەزار هێکتار زەویی کشتوکاڵی کرایە گەنم، کە 100 هەزار هێکتاری ئاوی و 340 هەزاریشی دێمی بوو.
