رووداو دیجیتاڵ
بەرەی تورکمانیی عێراق سەرکۆنەی ئەو هێرشە دەکات کە کرایە سەر نووسینگەی تایبەتی مەسرور بارزانی، سەرۆکی حکومەتی هەرێمی کوردستان و ماڵی بەڕێوەبەری ئاژانسی پاراستن لە پیرمام و دەڵێت، "ئاسایشی هەرێمی کوردستان بەشێکی دانەبڕاوە لە ئاسایشی عێراق."
ئەمڕۆ دووشەممە، 17ـی ئابی 2026، محەممەد سەمعان ئاغا، سەرۆکی بەرەی تورکمانیی عێراق لە راگەیێندراوێکدا هێرشەکەی وەک "پێشهاتێکی مەترسیدار و رەتکراوە" وەسف کردووە و دەڵێت، ئەو هێرشە، "دەستدرێژییە بۆ سەر سەروەریی عێراق و ئارامی و سەقامگیریی وڵات."
سەرۆکی بەرەی تورکمانی دەشڵێت، "ئاسایشی هەرێمی کوردستان بەشێکی دانەبڕاوە لە ئاسایشی گشتیی عێراق. بەئامانجگرتنی هەر بەشێک لە خاک، دامەزراوە یان بەرپرسانی هەرێمی کوردستان، بەئامانجگرتنی سەروەریی نیشتمانییە، ئەمەش وا دەخوازێت لێکۆڵینەوەی ورد لە هێرشەکە بکرێت و رێکاری پێویست بۆ رێگریکردن لە دووبارەبوونەوەی بگیرێتەبەر."
محەممەد سەمعان ئاغا رایگەیاندووە، "پێویستە عێراق لە ململانێ و ئاڵۆزییەکانی ناوچەکە بە دوور بگیرێت. ئێمە جەخت دەکەینەوە لەسەر گرنگیی پەنابردن بۆ دیالۆگ و کەناڵە دیپلۆماسییەکان بۆ چارەسەرکردنی کێشەکان، بەجۆرێک کە ئاسایشی عێراق و سەقامگیریی هەموو پێکهاتەکانی بپارێزرێت."
بەگوێرەی زانیارییەکانی دژەتیرۆری کوردستان، بەرەبەیانی رۆژی دووشەممە 17ی ئابی 2026، لە کاژێر 00:28، دوو درۆنی بۆمبڕێژکراو لە جۆری (حەدید-110) لە دیوی سنووری وڵاتی ئێرانەوە ئاراستەی بارەگای نووسینگەی تایبەتی سەرۆکوەزیرانی هەرێمی کوردستان و شوێنی حەوانەوەی بەڕێوەبەری ئاژانسی پاراستن لە قەزای پیرمامی پارێزگای هەولێر کران.
