رووداو دیجیتاڵ
بەڕێوەبەرایەتیی گشتیی ئۆپراسیۆنەکانی ئاسایشی هەرێم (سلێمانی)، دەستگیرکردنی حەوت چەکداری داعشی لە شاری سلێمانی و دەوروبەری راگەیاند، کە لەلایەن دادگاکانی عێراقەوە داواکراو بوون.
رۆژی سێشەممە، 18ـی ئابی 2026، دەزگای ئاسایشی هەرێم (سلێمانی) لە راگەیێندراوێکدا ئاماژەی بەوە کرد، لەسەر بنەمای زانیاریی وردیی هەواڵگری، هێزەکانیان توانییان 7 "تیرۆریست"ـی داواکراوی داعش دەستگیربکەن، کە لە ناو شاری سلێمانی و دەوروبەری خۆیان حەشاردابوو.
بەپێی راگەیێندراوەکەی ئاسایش، ئەو دەستگیرکراوانە پێشتر چەکداری گرووپی داعش بوون و بەپێی ماددەی (4)ـی تیرۆر لەلایەن دادگاکانی عێراقەوە داواکراو بوون.
سەبارەت بە چارەنووسی دەستگیرکراوەکان، ئاسایشی هەرێم رایگەیاند: "تیرۆریستەکان رادەستی لایەنە پەیوەندیدارەکانی حکومەتی فیدراڵ کران، ئەوەش بەپێی تایبەتمەندیی شوێنی تاوان بۆ تەواوکردنی رێکارەکانی لێکۆڵینەوە و دادگاییکردن."
