رووداو دیجیتاڵ
یاشار گولەر، وەزیری بەرگریی تورکیا، لە رێگەی پەیامێکەوە بۆ مەسرور بارزانی، سەرۆکوەزیرانی هەرێمی کوردستان، سەرکۆنەی ئەو هێرشە دەکات کە بە 2 درۆنی بۆمبڕێژکراو کرایە سەر نووسینگەکەی و جەختی لە هاوسۆزیی وڵاتەکەی بۆ هەرێمی کوردستان کردەوە.
یاشار گولەر نامەیەکی بۆ مەسرور بارزانی ناردووە و نووسینگەی سەرۆکوەزیرانی هەرێمی کوردستانیش وێنەیەکی نامەکەی بۆ رووداو ناردووە، تێیدا هاتووە، بە نیگەرانییەکی زۆرەوە ئەو هەواڵەی پێگەیشتووە کە بە دوو درۆنی بۆمبڕێژکراو هێرش کراوەتە سەر نووسینگەی سەرۆکوەزیرانی هەرێمی کوردستان.
لە پەیامەکەدا هاتووە: "بە تووندی سەرکۆنەی ئەم هێرشە دەکەم کە ئاسایش و سەقامگیری و ئاشتیی ناوچەکە دەکاتە ئامانج."
وەزیری بەرگریی تورکیا بە ناوی خۆی و وەزارەتەکەیەوە هیوای سەلامەتی بۆ سەرۆکوەزیرانی هەرێمی کوردستان دەخوازێت: "هیوادارم ئاشتی و ئاسایش لە ناوچەکەدا باڵادەست بێت و دراوسێکانمان بتوانن لە کەشێکی پڕ لە ئارامی و سەقامگیریدا بژین."
یاشار گولەر جەختی لە هەڵوێستی وڵاتەکەی کردووەتەوە و دەڵێت: "دەبێت ئەوە دووپات بکەمەوە تورکیا لە بەرامبەر ئەو کەسانەی هەوڵ دەدەن ناوچەکەمان بەرەو پشێوی و پاشاگەردانی بەرن، هەمیشە لەگەڵ دۆست و هاوبەشەکانی دەمێنێتەوە."
بە گوێرەی دژە تیرۆری کوردستان، بەرەبەیانی رۆژی دووشەممە 17-08-2026، دوو درۆنی بۆمبڕێژکراو کە "لە سنووری ئێرانەوە" ئاراستە کرابوون، نووسینگەی تایبەتی مەسرور بارزانی، سەرۆکوەزیرانی هەرێمی کوردستان و شوێنی حەوانەوەی بەڕێوەبەری ئاژانسی پاراستنیان لە پیرمام لە پارێزگای هەولێر کردە ئامانج.
