رووداو دیجیتاڵ
رووپێوی بۆ 1600 ماڵباتی پەنابەر لە هەرێمی کوردستان دەکرێت، پرۆسەکە دەستیپێکردووە و تاوەکو نێوەڕاستی ئەیلوولی داهاتوو بەردەوام دەبێ.
شوان عەباس، سەرپەرشتیاری رووپێویی پەنابەران لە دەستەی ئامار بە رووداوی راگەیاند: "رووپێوییەکە بۆ کۆکردنەوەی زانیارییە لەبارەی دۆخی پەنابەران، ژیان و گوزەرانیان."
بەشێکی زۆری ئەو پەنابەرانەی لە هەرێمی کوردستان دەژین، دۆخی ژیانیان باش نییە، بۆیە یەکێک لە ئامانجەکانی رووپێوییەکە دیاریکردنی رێژەی هەژارییە لەنێو پەنابەراندا.
شوان عەباس دەڵێت: "ماوەیەکە کار لەسەر رووپێوییەکە دەکەین، هەموو پەنابەران دەگرێتەوە.''
بەپێی زانیاریی دەستەی ئامار بۆ رووداو، کۆکردنەوەی داتاکانی پەنابەران و رووپێوییەکە مانگێکی دەوێت و نێوەڕاستی ئەیلوولی داهاتوو تەواو دەبێ، لەو ماوەیەدا رووپێوییەکە 1600 ماڵباتی پەنابەر لە پارێزگاکانی هەرێمی کوردستان دەگرێتەوە.
بەپێی ئاماری نەتەوە یەکگرتووەکان، لە جیهاندا 41 ملیۆن و 600 هەزار کەس پەنابەرن، ژمارەی ئاوارە و پەنابەران وئەوانەی لەبەر ململانێ ناوچەکانیان جێهێشتووە گەیشتووەتە 117 ملیۆن کەس.
لە هەرێمی کوردستانیش بەپێی ئاماری 2025ـی ناوەندی هاوبەشی هەماهەنگی و قەیرانەکان زیاتر لە 900 هەزار ئاوارە و پەنابەر هەن، لەو ژمارەیە 269 هەزاریان پەنابەرن، 251 هەزار پەنابەری رۆژئاوای کوردستان و سووریا، زیاتر لە 7 هەزار پەنابەری تورکی، هەروەها 8 هەزار پەنابەری ئێرانی هەن، پەنابەران 30٪ لە کەمپ و 70٪یشیان لە دەرەوەی کەمپەکان دەژین.
