رووداو دیجیتاڵ
سەرچاوەیەک لە وەزارەتی دارایی و ئابووریی هەرێمی کوردستان رایگەیاند، سەرەتای هەفتەی داهاتوو لیستی مووچەی ئەم مانگە و تەرازووی پێداچوونەوەی مانگی تەممووز لەلایەن شاندێکەوە بۆ بەغدا دەنێردرێن.
رۆژی پێنجشەممە، 20ـی ئابی 2026، سەرچاوەیەک لە وەزارەتی دارایی و ئابووریی هەرێمی کوردستان بە تۆڕی میدیایی رووداوی راگەیاند: "ئەمڕۆ رێکارەکان و ئامادەکارییەکانی لیستی مووچەی مانگی ئاب تەواوکران و ئێستا لیستی مووچە ئامادەیە."
بە گوتەی ئەو سەرچاوەیەی رووداو، مانگانە لەگەڵ ئامادەکردنی لیستی مووچە، دەبێت تەرازووی پێداچوونەوەی مانگی پێشتریش ئامادە بکرێت؛ گوتیشی: "تەرازووی پێداچوونەوەی مانگی تەممووزیش تەواوکراوە و ئامادەیە."
لەبارەی کاتی ناردنیان، ئەو سەرچاوەیەی وەزارەتی دارایی گوتی: "سەرەتای هەفتەی داهاتوو، لیستی مووچە و تەرازووی پێداچوونەوە لەلایەن شاندێکی تەکنیکیی وەزارەتەوە رەوانەی بەغدا دەکرێن و رێکارەکانی وردبینی لە لیستەکە دەستپێدەکات."
رۆژی 17ـی ئابی 2026 مووچەی مانگی تەممووز لەلایەن بەغداوە خەرجکرا و رۆژی 18ـی ئابی 2026 دابەشکردنی مووچە لە هەرێمی کوردستان دەستیپێکرد، ئەمڕۆ دابەشکردنەکە کۆتایی دێت.
