مەزڵووم عەبدی: تێکەڵکردنی هەسەدە و دامەزراوەکانی سووریا تەواو بووە

عەبدی ئەم قسانەی لە کاتی بەشداریکردنی لە ئاهەنگی 100 ساڵەی دامەزراندنی شاری قامشلۆی رۆژئاوای کوردستان کرد. فەرماندە کوردەکە روونیکردەوە کە بەپێی ئەو رێککەوتنەی لە سەرەتای ئەم ساڵدا کرا، پرۆسەیەک دەستیپێکرد کە تێیدا پێکهاتە سەربازییەکانی هەسەدە "کە بە خوێنی شەهیدەکانمان دروستکران"، لەگەڵ دەزگا کارگێڕی و خزمەتگوزارییەکان دەچنە نێو دامەزراوە نیشتمانییەکانی دەوڵەتی سووریا، بەڵام لە هەمان کاتدا ناسنامەی تایبەتی خۆیان دەپارێزن.

فەرماندەکەی هەسەدە بە خەڵکی ئامادەبووی گوت: "ئەم پرۆسەی تێکەڵکردنی دامەزراوە سەربازییەکانمان، دامەزراوە خزمەتگوزارییەکانمان و دامەزراوە کارگێڕییەکانمان بە دامەزراوە نیشتمانییەکانی دەوڵەت تەواو بووە. لەمەودوا پرۆسەیەکی نوێ دەستپێدەکات."

مەزڵووم عەبدی ئاماژەی بەوە کرد کە لەو ناوچانەی پێشتر دەکەوتنە سنووری بەڕێوەبەرایەتیی خۆسەر، دامەزراوەی نوێ بە ناوی دەوڵەتی سووریاوە دادەمەزرێن، لە کاتێکدا دامەزراوەکانی پێشووش بەردەوام دەبن لە کارکردن؛ داوایشی لە خەڵکی ناوچەکە کرد ئەم دامەزراوانە بپارێزن، چونکە "ئەوانە دەستکەوتی شۆڕش و قوربانیدانی گەلن".

لە بەشێکی گرنگی گوتارەکەیدا، عەبدی باسی لەوە کرد، ئەو هێزانەی لە پارچەکانی دیکەی کوردستانەوە بۆ پاڵپشتیکردنی هەسەدە لە کاتی شەڕەکاندا چووبوون، ئێستا بەپێی رێککەوتن و لەسەر داوای هەسەدە خۆی، لە کشانەوەدان. مەزڵووم عەبدی گوتی: "دەتوانین بڵێین ئەمڕۆ پرۆسەیەکی نوێ لە ناوچەکەماندا دەستپێدەکات."

ئەم گوتارەی مەزڵووم عەبدی لە کاتێکدایە، هەوڵەکان بۆ بونیاتنانی سووریایەکی نوێ لەدوای رووخانی دەسەڵاتی بەعس بەردەوامە. فەرماندەکەی هەسەدە جەختی لەوە کردەوە کە هەسەدە بڕیاری داوە ببێتە بەشێک لەم پرۆسەیە و ئاماژەی بەوەش کرد کە خەبات بۆ جێگیرکردنی مافە رەواکانی گەلانی ناوچەکە، بەتایبەتی کورد لە دەستووری داهاتووی سووریادا لە رێگەی سیاسییەوە بەردەوام دەبێت و بەهێزتریش دەکرێت.

فەرماندەی هەسەدە باسی لە فرەنەتەوەیی و فرەپێکهاتەیی شاری قامشلۆ کرد و گوتی: "کورد، عەرەب، سریانی، ئاشووری، ئەرمەنی و پێکهاتەکانی دیکە بۆ زیاتر لە سەدەیەک لە ناوچەی جەزیرە پێکەوە ژیاون". بەڵام رەخنەی تووندی لە سیاسەتەکانی دەیان ساڵەی بەعس گرت کە "ویستوویانە دیمۆگرافیای ناوچەکە بگۆڕن، ناسنامە و زمانەکان قەدەخە بکەن و دووبەرەکی بنێنەوە".

لەگەڵ ئەوەشدا، گەشبینیی خۆی دەربڕی کە سووریای نوێ ئەو جۆرە سیاسەتانە رەتدەکاتەوە و رێگە دەدات منداڵان بە زمانی دایکیان بخوێنن و پێکهاتەکان بە ئازادی بە کولتووری خۆیانەوە بژین.

عەبدی ستایشی رۆڵی هەسەدەی کرد لە 15 ساڵی رابردوودا بۆ پاراستنی ناوچەکە لە هێرشە گەورەکانی سەردەمی شەڕی ناوخۆی سووریا، سوپاسی ئەو شەڕڤانانەی کرد کە لە سەرانسەری کوردستانەوە رۆیشتبوون و زۆریشیان شەهید بوون، داوایشی لە خەڵک کرد بەردەوام بن لە پاڵپشتیکردنی ئەو دامەزراوانەی بە قوربانیدانی ئەوان دروستبوون "بۆ ئەوەی قامشلۆ ببێتە ناوەندی کولتوور، سیاسەت و گەشەسەندن لەنێو سووریایەکی ئاشتیخواز و سەقامگیردا."