رووداو دیجیتاڵ
لە شاری ئامەدی باکووری کوردستان پرسە بۆ 49 گەریلای پەکەکە دانرا کە لە شەڕدا گیانیان لەدەستدابوو و هاوسەرۆکی پارتی یەکسانی و دیموکراسیی گەلان (دەم پارتی)یش بەشداری لە پرسەکەدا کرد.
رۆژی هەینی، 21ی ئابی 2026 لە پارکی کۆشویۆڵو لە گەڕەکی باغلاری لە شاری ئامەد، (کۆمەڵەی هاوکاری، پاڵپشتی، یەکێتی و کولتووری ئەو خێزانانەی کەسوکاریان لە لانکەی شارستانیەتەکاندا لەدەستداوە) پرسەی بۆ 49 گەریلای پارتی کرێکارانی کوردستان (پەکەکە) دانا کە لە شەڕی نێوان پەکەکە و سوپای تورکیا گیانیان لەدەست دابوو.
لە پرسەکەدا تونجەر باکرهان، هاوسەرۆکی گشتی پارتی یەکسانی و دیموکراسی گەلان (دەم پارتی) بەشداری کرد و سەرەخۆشی لە کەسوکاری ئەو هاونیشتمانییانە کرد.
جگە لە باکرهان، هەریەک لە گولیستان کڵچ کۆچیغیت، پەرلەمانتاری دەم پارتی لە بازنەی قەرس و عەدالەت کایە، پەرلەمانتاری دەم پارتی لە بازنەی ئامەد بەشداریان لە پرسەکەدا کرد.
هاوکات پرسە لە ناوچەکانی بیسمیل و فەرقینی ئامەد دانرا کە بریارە بۆ 3 رۆژ بەردەوام بێت.
ئەم هەنگاوە لە کاتێکدایە کە پرۆسەی چارەسەری لە تورکیا و باکووری کوردستاندا گەیشتووەتە قۆناخی جێبەجیکردنی یاسای بەهێزکردنی پاڵپشتی نیشتیمانی و یەکگرتنی کۆمەڵایەتی، کە تایبەتە بە رێکخستنی زەوینەی یاسایی بۆ چەکدانان و گەڕانەوەی گەریلاکانی پەکەکە.
(کۆمەڵەی هاوکاری، پاڵپشتی، یەکێتی و کولتووری ئەو خێزانانەی کە کەسوکاریان لە لانکەی شارستانیەتەکان لەدەستداوە) لە باکووری کوردستان کار بۆ هاوکاریکردنی خێزانی قوربانیانی شەڕ دەکات.
