رووداو دیجیتاڵ
کشتوکاڵی پارێزگای ورمێ رایگەیاند، ئەم ساڵ زیاتر لە 27 هەزار تۆن هەنگوین لە لایەن هەنگەوانانی ئەو پارێزگایە بەرهەمهێنراوە و بەشێکی هەناردە دەکرێت.
رۆژی یەکشەممە، 23ی ئابی 2026، محەممەد رەزا ئەسغەری، بەڕێوەبەری کشتوکاڵی پارێزگای ورمێ لە رۆژهەڵاتی کوردستان رایگەیاند، "ئەم ساڵ 27 هەزار و 903 تۆن هەنگوین لەلایەن هەنگەوانانی ئەو پارێزگایە بەرهەمهێنراوە".
بە گوتەی محەممەد رەزا ئەسغەری، ورمێ لە بەرهەمهێنانی هەنگویندا لەسەر ئاستی ئێران و رۆژهەڵاتی کوردستان، یەکەمە.
محەممەد رەزا ئەسغەری گوتی، "زۆربەی ئەو هەنگوینەی لە پارێزگای ورمێ بەرهەمهێنراوە، رەوانەی بازاڕە نێوخۆییەکانی ورمێ و شارەکانی دیکەی ئێران کراوە، هەروەها بەشێکیشی هەناردەی عێراق وڵاتانی ئەورووپا دەکرێت." گوتیشی، هەوڵدەدەن هەناردەکردن زیاتر بکەن.
بەپێی ئاماری کشتوکاڵی پارێزگای ورمێ، زیاتر لە 6 هەزار و 700 پوورەی هەنگ هەن، کە لە یەک ملیۆن و 404 هەزار سندووقی هەنگ پێکدێن. زیاتر لە 6 هەزار کەسیش لە سنووری پارێزگاکە خەریکی هەنگەوانین.
لەڕووی کواڵێتییەوە، هەنگوینی ناوچەی مەرگەوەری ورمێ بە یەكێک لە باشترین جۆری هەنگوین لەسەر ئاستی رۆژهەڵاتی کوردستان دادەنرێت.
بەپێی ئامارە فەرمییەکان، لە ساڵەکانی 2022 و 2023 بەرهەمی هەنگوین لە پارێزگای ورمێ زیاتر لە 30 هەزار تۆن بووە، بەڵام لەو چەند ساڵەی دواییدا کەمی کردووە، وشکەساڵی و زیاتربوونی تێچووی هەنگەوانی بە هۆکاری سەرەکیی دابەزینی بەرهەمی هەنگوین لە پارێزگاکە دادەنرێن.
