رووداو دیجیتاڵ
سەرۆکی هەرێمی کوردستان لەگەڵ سەرۆکی رەوتی حیکمەی نیشتمانی کۆبووەوە. لە دیدارەکەدا جەخت لە چارەسەرکردنی کێشەکانی نێوان هەولێر و بەغدا لەڕێگەی دیالۆگەوە کرایەوە.
رۆژی دووشەممە، 7ی ئەیلوولی 2026، نێچیرڤان بارزانی، سەرۆکی هەرێمی کوردستان لە هەولێر پێشوازی لە عەممار حەکیم، سەرۆکی رەوتی حیکمەی نیشتمانی و شاندێکی یاوەری کرد.
بەگوێرەی راگەیێندراوێکی سەرۆکایەتیی هەرێمی کوردستان، لە دیدارێکدا بارودۆخی گشتیی عێراق و هەرێمی کوردستان تاوتوێ کرا و هەردوولا جەختیان لە گرنگیی بەردەوامیی کارکردن بۆ بەرەوپێشبردنی پەیوەندییەکانی نێوان هەولێر و بەغدا و چارەسەرکردنی کێشە هەڵپەسێردراوەکان لەڕێگەی دیالۆگ و لێکتێگەیشتنەوە کردەوە.
لە تەوەرێکی دیکەی کۆبوونەوەکەدا، هەردوولا پشتیوانیی خۆیان بۆ حکومەتی عێراق لەپێناو سەرخستنی ئەرک و کارنامەکەیدا دووپاتکردەوە.
هەروەها بارودۆخی ناوچەکە، دوایین پێشهات و لێکەوتەکانی، تەوەرێکی دیکەی دیدارەکە بوو و ئاڵوگۆڕی بیروڕایان لەبارەیەوە کرد.
بەیانیی ئەمڕۆ، سەرۆکی رەوتی حیکمەی نیشتمانی بە سەردانێک گەیشتە هەولێر و بڕیارە لە سێ رۆژدا لەگەڵ بەرپرسانی باڵای هەرێمی کوردستان، ژمارەیەک لایەنی سیاسی، کەسایەتیی ئایینی و نوێنەرانی پێکهاتە جیاوازەکان کۆببێتەوە.
