رووداو دیجیتاڵ
دوو کچە قوتابی لە شارەکانی هەولێر و خانەقین، لە تاقیکردنەوەکانی خولی
دووەمی پۆلی 12ی ئامادەییدا بە بەدەستهێنانی کۆنمرەی 700 و نمرەی تەواو، ناویان لە
ریزبەندی یەکەمەکانی ئاستی باشووری کوردستاندا تۆمار کرد.
لاڤین کازم، قوتابیی پۆلی 12ی ئامادەییی هەولێری کچانی حکومییە و دەیەوێت
هاوشێوەی براکەی لە کۆلێژی پزیشکیی گشتی درێژە بە خوێندن بدات. بەپێی وتەی لاڤین،
خێزانەکەی پاڵپشت و هاوکاری سەرەکیی رێی سەرکەوتنی بوون.
لاڤین کازم، یەکێک لە یەکەمەکانی پۆلی 12ی ئامادەیی لەبارەی
سەرکەوتنەکەیەوە بە رووداوی راگەیاند: "پێشبینیی ئەم نمرەیەم کردبوو چونکە
سەیری وەڵامەکانم کردبووەوە؛ بە هاوکاریی خوای گەورە توانیومە بەدەستی بهێنم. رۆژانە
10 تاوەکو 12 کاتژمێر دەمخوێند و بەپشتیوانیی خوا دەکەمە کۆلێژی پزیشکیی گشتی
تاوەکو لەگەڵ براکەمدا درێژە بە خوێندن بدەم."
کازم سەعدوڵڵا، باوکی لاڤین لەبارەی هاوکاریکردنی کچەکەیەوە بە رووداوی
گوت: "ئێمە وەک دایک و باوک بە تەواوی پاڵپشتیمان دەکرد و هانمان دەدا تاوەکو
لە وانەکانی سارد نەبێتەوە؛ رێنماییەکانی ئێمە و پشتگیرییەکانی براکەی کاریگەریی
زۆریان لەسەر هەبوو."
هاوکات لە شاری خانەقین، قوتابییەکی دیکە بە ناوی مینا هەژار توانی بە
هەمان شێوە کۆنمرەی 700 بەدەستبهێنێت و ببێتە یەکێک لە یەکەمەکانی ئاستی هەرێمی
کوردستان.
مینا هەژار، یەکێک لە یەکەمەکانی پۆلی 12ی ئامادەیی لە خانەقین لەبارەی
ئاستەنگ و هەوڵەکانییەوە بە رووداوی راگەیاند: "ڕۆژانە بە بەردەوامی دەمخوێند
و پابەندی وانەکانم بووم، مامۆستاکانیشم زۆر یارمەتیدەرم بوون. رێگایەکی دوورودرێژ
بوو بەڵام بەردەوام هەوڵم دا. نیەتی ئەوەم هەبوو لە خولی یەکەمدا سەرکەوتن
بەدەستبهێنم بەڵام بارودۆخ و دۆخی خانەقین نەیهێشت، بەڵام سوپاس بۆ خوا لە خولی
دووەمدا توانیم بەو ئامانجە بگەشم."
بەپێی ئامارەکانی وەزارەتی پەروەردەی هەرێمی کوردستان، ئەم ساڵ 117 هەزار و
142 قوتابی بەشدارییان لە تاقیکردنەوەکانی پۆلی 12ی ئامادەییدا کردبوو.
تاقیکردنەوەکانی خولی دووەم لە 11ی ئاب دەستیان پێکرد و لە 30ی هەمان مانگ
کۆتاییان هات، هاوکات ڕۆژێک دوای کۆتاییهاتنی تاقیکردنەوەکانیش ئەنجامەکان بە
فەرمی راگەیێندران.
